१४ फागुन, वीरगंज ।
पर्साका दुई मदिरा उद्योगी दाजुभाई शुम्भु प्रसाद कलवार र ओमप्रकाश कलवारले राजस्व विभागको न्यायाधिकरणको कार्यालयमा पुनरावेदन गरेका छन्।
हाल उनीहरु दुबैजना वीरगंज कारागारमै कैद भुक्तान गरिरहेका छन् ।
आन्तरिक राजस्व कार्यालय पर्साले गत असोजमा अन्तशुल्क हिनमिनामा ३७ करोड २७ लाख दण्ड, जरिवानासहित १ वर्षको कैद सजाय निर्णय गरेपछि कैद सजाय भुक्तान गरिरहेका दुबै दाजुभाई यसअघि दुईवटा निकायबाट मुद्दाको पुनरावेदनमा असफल भएका छन्।
तेस्रो प्रयास स्वरुप उनीहरुले राजस्व विभागको न्यायाधिकरणको कार्यालयमा पुनरावेदन गरेको बुझिएको छ ।
वीरगंज रामगढवामा रहेको उदयपुर डिस्टीलरीले अन्तशुल्क हिनामिना गरेको भन्दै अन्तशुल्क,आयकर र भ्याट गरी कुल ३१ करोड र पोखरीयाको बसतपुरमा रहेको जयश्री धौलागिरी डिस्टीलरीले ६ करोड २७ लाखको कर छली गरको भन्दै कुल ३७ करोड २७ लाखको कर, जरिवानासहित १ वर्षको कैद सजाय तत्कालिन आन्तरिक राजस्व कार्यालय पर्साका प्रमुख कर अधिकृत गोपिकृष्ण कोइरालाको ईजलाशले फैसला सुनाएको थियो ।
त्यसपछि कलवार दाजुभाईले सर्बोच्च अदालतमा गैरकानुनी थुनामा राखेको भन्दै बन्दी प्रत्यक्षिकरणको रिट दिएको थियो ।
सर्वोच्च अदालतले मुद्दा दरपिठ नगरेपछि आन्तरिक राजस्व विभागमा पनि अभियुक्तका वारेसहरुले पुरनावेदन दिन गएको तर अन्तशूल्कको हकमा विभागले पनि पुनरावेदन लिन नमानेपछि आन्तरिक राजस्व विभागकै न्याधिकरणको कार्यालयमा पुनरावेदन गरिएको र त्यसै उपर सुनुवाई भइरहेको आन्तरिक राजश्व कार्यालय पर्साका प्रमुख कर अधिकृत सुनिलप्रसाद यादवले बताए ।
उनका अनुसार दुबै उद्योग खोल्ने आदेश आएकोले उद्योगको उत्पादन खोल्ने अनुमति दिएको तर मुद्दाको हकमा न्याधिकरणको कार्यालयको अन्तिम फैसाला नआएकोले अभियुक्तहरुको बारेमा कुनै टुंगो नलागेको प्रष्ट पारे ।
उनका अनुसार न्यायाधिकरणको कार्यालयले २ वर्ष भित्र मुद्दा टुङ्ग्याउने बताएको छ ।
