२० चैत, काठमाडौँ । आगामी नोभेम्बरमा बेलायतको ग्लास्गोमा हुने जलवायु परिवर्तनसम्बन्धी राष्टसंघीय संरचना महासन्धि (यूएनएफसीसीसी) का पक्ष मुलुकहरुको २६ औं सम्मेलन (कोप २६) कोरोना संक्रमण (कोभिड १९) का कारण स्थगित गरिएको छ ।
जर्मनीको बोनमा मुख्यालय रहेको यूएनएफसीसीसीको कोप ब्युरोले यो निर्णय गरेको हो। गत मंसिरमा स्पेनको म्याड्रिडमा भएको २५ औं जलवायु सम्मेलनले २६ औं सम्मेलन ग्लास्गोका लागि तय गरेको थियो । कोप २६ को मिति तोकिएको छैन ।
यो सम्मेलन सम्भवतः सन् २०२१ को मध्यतिर आयोजना हुने अपेक्षा गरिएको छ । कोरोना संक्रमणले विश्व नै अक्रान्त भएपछि करिब ३० हजार मानिस सहभागी हुने उक्त सम्मेलन स्थगित गर्नुपर्ने माग उठेको थियो ।
कोप २६ को स्थल तोकिएको स्कटीस इभेन्ट्स क्याम्पसलाई कोभिड १९ का बिरामीको अस्थायी अपतालमा रुपान्तरण गरिएको छ । कोभिड १९ का कारण विश्वनै अहिले आक्रान्त बनेको छ ।
