२४ बैशाख, काठमाडौं । उपचारपछि निको भएर घर फर्किएका तीन जनामा फेरि कोरोना भाइरस (कोभिड १९) को सङ्क्रमण देखिएको छ ।
काठमाण्डौ, वीरगञ्ज र रौतहटका एकरएक जनामा फेरि कोरोनाको सङ्क्रमण भेटिएको स्वास्थ्य मन्त्रालयले जनाएको छ ।
मन्त्रालयका प्रवक्ता डाक्टर विकास देवकोटाले वीरगञ्जमा उपचारपछि निको भएकामा फेरि सङ्क्रमण देखिएर अस्पतालमा भर्ना भएको खबर आएको जानकारी दिए ।
काठमाण्डौको सनसिटी अपार्टमेन्टमा यसअघि सङ्क्रमण देखिएर उपचारपछि निको भएका पुरुषलाई फेरि सङ्क्रमण भएको डाक्टर देवकोटाले जानकारी दिए ।
त्यस्तै भारतबाट फर्केका रौतहटका एक युवकमा पनि सङ्क्रमण दोहोरिएको हो । (रासस)
