२५ वैशाख, बाँके।
बाँकेमा कोरोना भाइरसबाट संक्रमितसँग २३ जनाको सम्पर्कमा आएका ५६ जनाको रिपोर्ट सार्वजनिक गरिएको छ।
मंगलवार ५६ जनाको स्वाब संकलन गरेर पीसीआर परीक्षणका लागि भेरी अस्पतालको ल्याबमा पठाइएको थियो। अस्पतालले बुधवार ५६ जनाकै रिपोर्ट सार्वजनिक गरेको हो। सबैको परीक्षण रिपोर्ट नेगेटिभ आएको भेरी अस्पतालका मेडिकल सुपरिडेन्ट डाक्टर प्रकाश थापाले जानकारी दिए।
संक्रमितसँग सम्पर्कमा आएका ५६ जनाको रिपोर्ट नेगेटिभ आएको छ। बुधवार थप १ सय ३६ जनाको स्याम्पल कलेक्सन गरिएको छ। उनीहरुको परीक्षण भइरहेको छ, उनले भने। डाक्टर थापाका अनुसार संक्रमितको सम्पर्कमा रहेका थप १ सय ३६ जनामध्ये केहीको रिपोर्ट आज साँझ आउने र भोलि बिहानसम्म सबैको रिपोर्ट आउनेछ।
थापाले केन्द्रको टोली र विश्व स्वास्थ्य संगठनका प्रतिनिधिसँग समन्वय गरेर कन्ट्याक्ट ट्रेसिङ तथा संक्रमण कहाँबाट फैलियो भन्ने अध्ययन भइरहेको बताए। जिल्ला प्रहरी कार्यालय बाँकेका प्रहरी निरीक्षक सुरज खत्रीले रिपोर्ट नेगेटिभ आएकाहरु क्वारेन्टाइनमा बसिरहेको बताए।
उनीहरु सिल गरिएको टोलका हुन्। घरबाट बाहिर आउन दिइएको छैन। उनीहरु जलनपुरवा क्वारेन्टाइनमा छन्, उनले भने। उनका अनुसार आज नरैनापुरतिर स्वाब संकलनको काम भइरहेको छ। नेपालगञ्जको वडा नम्बर ८ स्थित इस्लामिया फैजुल उलम मदरसाका ६० वर्षीय शिक्षकलाई गत शुक्रवार कोरोनाको संक्रमण देखिएको थियो।
उनको सम्पर्कमा आएका १०५ जनाको स्वाब संकलन गरी भेरी अस्पतालमा परीक्षण गर्दा ७ र ९ वर्षीया बालिकासहित थप २२ जनामा संक्रमण देखिएको थियो। उनीहरु सबै सुशील कोइराला प्रखर क्यान्सर अस्पतालको आइसोलेसनमा उपचाररत छन्।
तिनै २३ जनाको कन्ट्याक्ट ट्रेसिङको काम चलिरहेको छ। बुधवारसम्म सम्पर्कमा देखिएका १९२ जनाको स्वाब संकलन गरिएको छ। परीक्षण भएका ५६ जनामा संक्रमण देखिएको छैन।
