१८ जेठ, ब्रासिलिया ।
विश्वभर महामारीका रुपमा फैलिएको कोरोनाभाइरसबाट आइतबारसम्म ६० लाखभन्दा बढी मानिस सङ्क्रमित भएका छन् । पछिल्लो पटक ब्राजिलमा दैनिक सङ्क्रमितको सङ्ख्या निकै बढी देखिएको छ ।
दक्षिण अमेरिकी मुलुकहरूमा आउँदो सप्ताह पनि निकै सकसपूर्ण हुने अनुमान गरिएको छ । कोरोनाभाइरस सङ्क्रमितको सङ्ख्या वा मृत्यु हुने व्यक्तिको सङ्ख्यामा कमी आउने कुनै लक्षण देखिएका छैनन् । खासगरी ब्राजिलमा राष्ट्रपति जेयर बोल्सोनारो र अरु प्रमुख नेताहरूबीच नै भाइरसलाई लिएर मतभिन्नता कायमै छ ।
ब्राजिलमा संयुक्तराज्य अमेरिकापछि सबैभन्दा बढी कोरोनाभाइरस सङ्क्रमित छन् । यहाँ सङ्क्रमितको सङ्ख्या पाँच लाख नाघिसकेको छ भने मृत्यु हुने व्यक्तिको सङ्ख्या ३० हजार पुग्न लागेको छ । कोरोना प्रसार रोक्न जारी लकडाउन यथावत राख्ने वा हटाउने भन्नेमा नेताहरूबीच मतैक्य हुन सकेको छैन । राष्ट्रपति जेयर बोल्सोनारोको विचारमा लकडाउनबाट अर्थतन्त्रमा पुग्ने असर भाइरसभन्दा खतरनाक हुनेछ । उहाँले मुलुकका गभर्नर र मेयरहरूलाई लकडाउनको विकल्प खोज्न निरन्तर आग्रह गरिरहनुभएको छ ।
विश्वभर कोरोनाका कारण तीन लाख ६८ हजारभन्दा बढी व्यक्तिको मृत्यु भएसँगै संयुक्तराज्य अमेरिका, युरोप र एसियाका धेरै मुलुकले लकडाउन हटाउने वा जनजीवनलाई खुकुलो बनाउनेतिर ध्यान दिन थालेका छन् ।
युरोपेली युनियनले एक विज्ञप्ति प्रकाशन गरी देशहरूबीच थप सहयोग बढाई सामूहिक समाधान खोज्न आग्रह गरेको छ । जर्मनीका स्वास्थ्य मन्त्री हेन्स स्पाहनले विश्व स्वास्थ्य सङ्गठनको सहयोग कटौती गर्ने अमेरिकी प्रशासनको निर्णय निकै निराशाजनक रहेको प्रतिक्रिया दिनुभएको छ । यसैबीच, राष्ट्रपति ट्रम्पले ह्वाइट हाउसमा अर्को महिनाका लागि डाक्नुभएको जी७ को बैठकमा जर्मन चान्सलर एन्जेला मर्केल सहभागी नहुने घोषणाले पनि विश्व जनमत अझै विभाजित रहेको देखाउँछ ।
कोरोनाभाइरसको प्रसार रोक्ने प्रयासस्वरुप जारी लकडाउनले जनजीवन र अर्थव्यवस्था तहसनहस हुन लागेको भन्दै धेरै मुलुकले लकडाउनलाई खुकुलो बनाउन थालेका छन् । केही विज्ञहरूले लकडाउन खोल्नासाथ दोस्रो चरणको भाइरस प्रसार हुने खतरा औँल्याएका छन् ।
सोमबार लकडाउन हटाउने तयारी गरेको बेलायतमा सरकारका वरिष्ठ सल्लाहकारहरूले लकडाउन खोल्न हतारिनु नहुने प्रतिक्रिया दिएका छन् । कोरोनाभाइरसका सङ्क्रमितको सङ्ख्या डरलाग्दो गरी बढेको देखिए पनि भारतले शनिबार आगामी जुनको पहिलो सातासम्ममा लकडाउन खोल्नेगरी तयारी गरेको घोषणा गरेको छ ।
इरानमा पनि मस्जिदहरूमा सामूहिक प्रार्थनाका लागि खुला गर्न सकिने घोषणा गरेको छ । जेरुसेलमको अल–अक्सा मस्जिदको परिसर पनि प्रार्थनाका लागि आइतबार पुनः खुला गरिएको छ ।संयुक्तराज्य अमेरिकी राजधानी वासिङ्टनमा रेस्टुराँहरू खुल्न थालेका छन् भने लस एन्जलसमा पनि रेस्टुराँ र सैलुनहरू खुलेका छन् ।
करिब २१ हजार ५०० व्यक्तिको मृत्यु भएको न्यूयोर्क शहर अगामी जुन ८ तारिखदेखि खुला हुँदैछ । अमेरिकामा कोरोनाभाइरसबाट एक लाख तीन हजारभन्दा बढीको मृत्यु भइसकेको छ भने झण्डै १७ लाख मानिस सङ्क्रमित छन् ।रासस / एएफपी
