१८ जेठ, विराटनगर ।
लामो समयदेखि जारी लकडाउनको समयमा बिहान बेलुका छाक टार्न मुस्किल पर्ने विपन्न गरिब तथा असहायहरुलाई खाना खुवाउने विराटनगरका युवाहरुको बीमा गरिएको छ । जेनेरल इन्स्योरेन्स कम्पनीले १० जना युवाहरुको कोरोना बीमा गरिदिएको हो ।
लकडाउन भएसँगै घर घरमा पुगेर उनीहरुले निःशुल्क खाना खुवाउँदै आएका थिए । विराटनगरकी नेकपाकी युवा नेतृ नमिता न्यौपानेको सहयोगमा प्रतिव्यक्ति एक लाखको कोरोना (कोभिड-१९) बीमा गरिएको हो ।
अब बीमा गरिएको व्यक्तिलाई कोरोना संक्रमित पुष्टि भएमा एक लाख बराबरको बीमा रकम प्राप्त गर्नेछन्। युवा नेता तथा सामाजिक अभियान्ता ओसिम आलमको नेतृत्वमा युवाहरुले विगत २ महिना अघिबाट सडक पेटीमा बस्नेहरुलाई निशुल्क खाना खुवाउँदै आएका छन् ।
