२९ जेठ, काठमाडौं ।
लकडाउनको समयमा प्रदर्शन गर्नेहरूलाई कारबाही गर्ने गृह मन्त्रालयले चेतावनी दिएको छ । पछिल्लो समय सरकारविरुद्धको आन्दोलनमा धेरैको सहभागिता बढ्न थालेपछि गृह मन्त्रालयले बिहीबार विज्ञप्ति जारी गर्दै यस्तो चेतावनी दिएको हो ।
गृह मन्त्रालयले बिहीबार विज्ञप्ति जारी गर्दै सामाजिक सञ्जालबाट आह्वान गर्ने, जुलस तथा शान्तिपूर्ण धर्नाका नाममा धेरै मानिस सहभागी हुने गरेको पाइएको मन्त्रालयले जनाएको छ । बिहीबारमात्र पनि बालुवाटारमा दुई हजारभन्दा बढी मानिस जम्मा भएर प्रदर्शन गरेका थिए ।
यो बन्दाबन्दीको आदेशविपरीत भएको भन्दै गृह मन्त्रालयले १०० देखि ६०० रुपैयाँसम्म र एक महिनादेखि ६ महिनासम्म थुनामा राख्न सक्ने स्मरण गराएको छ ।
मन्त्रालयले कठिनाईका बाबजुद पनि कोभिड–१९ रोकथाम तथा नियन्त्रणका लागि सरकारद्वारा जारी गरिएको लकडाउन पालना गरेकोमा धन्यवाद पनि ब्यक्त गरेको छ ।
