१ असार, काठमाडौँ ।
सरकारले आन्तरिक र अन्तर्राष्ट्रिय व्यावसायिक उडानलाई असार २१ गते राति ११ः ५९ सम्मलाई रोक लगाएको छ ।
जेठ २८ गतेको मन्त्रिपरिषद् बैठकले यो निणर्य गरेको संस्कृति, पर्यटन तथा नागरिक उड्डयन मन्त्रालयका सचिव केदारबहादुर अधिकारीले जानकारी दिए । उडान रोक्न सरकारले चैत ९ गतेयता गरेको यो सातौं निणर्य हो । यसअघि सरकारले जेठ ३२ गते सम्मलाई आन्तरिक र अन्तर्राष्ट्रिय व्यावसायिक उडानमा रोक लगाएको थियो ।
नागरिक उड्डयन प्राधिकरणको हवाई यातायात महाशाखाका प्रमुख सचितभक्त पोखरेलले आइतबार सबै आन्तरिक र अन्तर्राष्ट्रिय वायुसेवा कम्पनीका लागि जरुरी सूचना जारी गर्दै ‘सरकारको निणर्यअनुसार, व्यावसायिक यात्रु उडानलाई मात्र असार २१ गते राति ११ः५९ बजेसम्मका लागि रोक लगाइएको’ जनाएका छन् ।
व्यावसायिक उडानमा रोक लगाइए पनि सरकारले विशेष अनुमतिबाट उद्धार उडान गर्न र गराउन चार्टर उडान अनुमति भने दिँदै आएको छ । हालसम्म काठमाडौंबाट आन्तरिक र अन्तर्राष्ट्रिय गरी कम्तीमा डेढ सय उडान भइसकेका जनाईएको छ ।
