१ साउन, सिन्धुपाल्चोक ।
बुधबार राति भोटेकोसी गाउँपालिका–४ फुल्पिङकट्टीमा खसेको पहिरोमा पुरिएर दुई जनाको मृत्यु भएको छ भने तीन जना बेपत्ता भएका छन् ।
स्थानीय ग्याल्जेन शेर्पाको घर बगाउँदा परिवार सदस्यहरु १६ वर्षीया याङ्जी शेर्पा र ३५ वर्षीया साङ्बु शेर्पाको मृत्यु भएको हो । राति १ बजेतिर खकुन्डोलमाथिबाट आएको पहिरोले दुई घर बगाएकोमा ग्याल्जेनको परिवारका पाँच जना बेपत्ता भएका थिए ।
बिहीबार बिहानैदेखि प्रहरी र स्थानीय मिलेर खोजी गर्दा दुई जनाको शव भेटिएको र अन्य तीन जना अझ बेपत्ता रहेको गाउँपालिका प्रमुख राजकुमार पौडेलले बताए । उनका अनुसार १४ वर्षीया छिरिङवाङ्मु शेर्पा, ७५ वर्षीया सुमबुट्टी शेर्पा र ४० वर्षीया सेमसङ्ग शेर्पा बेपत्ता छन् ।
ग्याल्जेन भने राजधानीमा सवारी चलाउने पेसामा रहेकाले घटनाका बेला घरमा थिएनन् । स्थानीयका अनुसार राति पहिरो खसेको आवाजसँगै वरिपरिको बस्ती थर्किएको थियो ।
सोही पहिरोले फुल्पिङकट्टीकै नोर्साङ शेर्पाको घर बगाउनुका साथै पञ्चकन्या आधारभूत विद्यालयमा समेत क्षति पुर्याएको छ । ‘पहिरो आँखैअगाडि बाट भास्सिएर गयो, के हो भन्ने थाहा नपाउँदै भागेर बाँचियो,’ नोर्साङले भने ।
