योगेन्द्र योगी
६ साउन, दोहा ।
गैर आवासिय नेपाली संघ (एनआरएनए) कुवेतले कोरोना भाइरसका कारण राेजगारी गुमाएर चार्टर्ड हवाइ उडान खुलेको बेला पनि टिकटको जोहो गर्न नसकी थप समस्यामा परेका नेपालीकाे नामवली संकलन गर्ने भएको छ ।
वास्तविक कम्पनी बन्द भइ स्वदेश फर्किन टिकटको व्यवस्था गर्न नसकी समस्यामा परेर बसेकाहरुले एनआरएनए कुवेतका जो कोहिलाइ सम्पर्क गरी आफ्नो विवरण उपलब्ध गराउन अनुरोध गरिएको एनआरएनए कुवेतका आइसिसी सदस्य अमित चाम्लिङले जानकारी दिएका छन् ।
उनका अनुसार वास्तविक पीडितहरुको विवरण संकलन गरि आइसिसी महिला फोरमकी संयोजक भोमा लिम्बुलाई बुझाइने छ । उनी मार्फत वास्तविक समस्यामा परेका तथा आफ्नै खर्चमा टिकटको जोहो गरेर स्वदेश फर्कन नसकेकाहरुलाई सम्बिधित निकायको ध्यानाकर्षण गराई निशुल्क उद्दारको पहल गरिने चाम्लिङले बताए ।
एनआरएनए कुवेतले कोरोना भाइरस (कोभिड १९) को प्रकोपका कारण कुवेतमा कार्यरत नेपालीहरुमा परेको प्रत्यक्ष असरलाई मध्यनजर गर्दै श्रमिकहरुको साथी बन्दै समस्याललाई हल गर्दै आइरहेको जनाएको छ ।
चाहे राहतको पोको बोकेर होस चाहे अवैधानिक हैसियतमा बसोबास गरेका नेपाली श्रमिकहरुलाइ नेपाली दूतावाससंग सहकार्य गर्दै नेपाल फिर्ति तथा उनीहरुको समस्यालाई काउन्सिलिङ वा विभिन्न समस्या परेकाहरुलाई नेपाल फर्किनका लागि आवश्यक प्रक्रियाको लागि सहयोग गर्दै आएको एनआरएनए कुवेतले जनाएको छ ।
यस्तै केही हप्ता अगाडि पनि महिला र बालबालिकाहरुलाई विशेष प्राथामिकतामा राखेर कोरोना भाइरसका कारण समस्यामा परेका केही महिला र बालबालिकाहरुलाई उनीहरुको दैनिक उपभोगका सामान खरिदका लागि पनि आर्थिक सहयोग गरेको एनआरएनएले जनाएको छ ।
