११ साउन, काठमाडौं । पृथ्वी राजमार्ग अन्तर्गत नौबिसे-मुग्लिङ सडकखण्ड ६ दिनपछि सुचारु भएको छ ।
पहिरोका कारण अवरुद्ध सो सडकखण्ड गएरातिदेखि दुईतर्फी नै गाडी चल्न थालेको इन्जिनियर कृष्णराज अधिकारीले जानकारी दिए ।
मौवाखोलाको पुल मर्मतको काम सकिएपछि रातिदेखि नै गाडी चल्न थालेका हुन् । मौवाखोलामा रहेको पुलको केही भाग बगेपछि यो सडकखण्ड साउन ५ गतेदेखि बन्द थियो ।
यसैगरी पहिरोका कारण अवरुद्ध बेनी-जोमसोम-कोरोला सडकखण्ड १६ दिनसम्म पनि खुल्न सकेको छैन । म्याग्दीको दाना र गलेश्वर क्षेत्रमा पहिरो खस्दा र बेलिब्रिज बगाउँदा यो सडकखण्ड गएको असार २६ गतेदेखि अवरुद्ध भएको हो ।
सडक खुलाउन अझै समय लाग्ने सडक विभागले जनाएको छ । साँफेबगर-मार्तडी सडकखण्ड पनि १६ दिनदेखि बन्द नै छ । बुढीगङ्गा नदीले कटान गरेपछि अवरुद्ध यो सडकखण्ड खुल्न समय लाग्ने सडक विभागले जनाएको छ ।
यो सडकखण्डको अम्कोट, ताप्रीसेरा, घट्टेखोलालगायतका ठाउँमा पहिरोसमेत गएको छ । यस्तै पहिरोका कारण १२ दिनदेखि अवरुद्ध कान्ति लोकपथ पनि अझै सञ्चालनमा आएको छैन । यस्तै एक हप्तादेखि अवरुद्ध बेशी शहर चामे-सडकखण्ड पनि बन्द नै छ ।
घोप्टेखोला, रामबजार र च्याम्चेमा पहिरो गएकाले यो सडकखण्ड अवरुद्ध भएको हो । पहिरोका कारण डुम्रे(बन्दीपुर सडकखण्ड पनि अवरुद्ध छ । गल्छी-त्रिशुली-मैलुङ-स्याुफ्रुबेशी-रसुवागढी सडकखण्ड पनि साउन १ गतेदेखि अवरुद्ध नै छ ।
सडक सञ्चालनमा आउन समय लाग्ने सडक विभागले जनाएको छ । यस्तै काठमाडौको टोखा नगरपालिका-२ मालुङ पन्चेटारमा सडक भासिएपछि नुवाकोट जाने बाटो पनि अवरुद्ध भएको छ । लगातार पानी परेपछि भासिएको सडक मर्मतको काम चलिरहेको प्रहरीले जनाएको छ । बाटो अवरुद्ध भएकाले वैकल्पिक बाटो प्रयोग गर्न प्रहरीले अनुरोध गरेको छ ।
