४ भदौ, कञ्चनपुर ।
कञ्चनपुरमा आज मध्यरात १२ बजेदेखि लागू हुने गरी निषेधाज्ञा जारी गरिएको छ ।
जिल्ला प्रशासन कार्यालय कञ्चनपुरले कोरोना भाइरस सङ्क्रमण न्यूनीकरणका लागि आज मध्यरात १२ बजेदेखि आगामी भदौ १४ गते राति १२ बजेसम्मका लागि लागू हुने गरी निषेधाज्ञा जारी गर्ने निर्णय गरेको हो ।
कञ्चनपुरका प्रमुख जिल्ला अधिकारी नरहरि खतिवडाले तीज र गौरा पर्वमा यहाँ भीडभाड हुनसक्ने भएकाले आगामी भदौ १४ गते राति १२ बजेसम्मका लागि निषेधाज्ञा जारी गरिएको बताए ।
प्रजिअ खतिवडाले भने– “बजार पनि बेलुकी छिट्टै बन्द गर्न, सरकारी कार्यालयमा भीडभाड कम गर्न र यातायात सञ्चालनमा कडाइ गर्न निषेधाज्ञा जारी गर्ने निर्णय गरेका हौँ । ”
उनले निषेधाज्ञा अवधिमा अत्यावश्यक सेवा तथा वस्तु बाहेकका अन्य सबै प्रकारका उद्योग, व्यापार व्यवसाय सञ्चालन गर्न नपाइने बताए ।
