योगेन्द्र योगी
६ भदौ, दोहा ।
काठमाडौँको भीमसेनगोलामा रहेको गोल्डेन इगल मेनपावर मार्फत बिगत ९ महिना अघि साउदी पुगेका २३ नेपाली कामदारको अवस्था दयनीय भन्दै गएको छ । कम्पनीले पाँच महिना देखि तलब नदिएको र खान बस्नको लागि समेत समस्या भएको भन्दै उनीहरुले कहीँ कतैबाट पनि अहिलेसम्म सहयोग नपाएको गुनासो गरेका छन् ।
नेपालबाट मेनपावर कम्पनीले साउदीको असासात अल शमाल कंस्ट्रकटिङ कम्पनी भनेर पठाएको तर साउदी आइपुगेपछि नास ट्रस्र्ट स्काफोलडिङ कम्पनीमा काम गर्न लगाएको पीडित नेपालीहरुले बताएका छन् ।
यो कम्पनीमा पुगेपछि उनीहरुले केही महिना मात्र काम गर्न पाए । पाँच महिना अघि सबैलाई कामबाट निकाली दिएको र तलब पनि नदिएको हुँदा अलपत्र अवस्थामा बस्नुपर्ने बाध्यता सिर्जना भएको पीडितले गुनासो पोखेका छन् । म्यानपावर कम्पनीले उनीहरुबाट प्रतिव्यक्ति १ लाख २० हजार रुपैयाँ लिएको थियो । तर, नत मेनपावरले भने जस्तो कम्पनी भयो नत सेलरी नै भयो ।
म्यानपावरले खाने बस्ने सुविधासहित आठ घण्टाको १ हजार साउदी रियाल हुन्छ भनेर पठाएको तर यहाँ कम्पनीले आठ घण्टाको सुख्खा ९ सय रियाल दिने गरेको उनीहरुको भनाई छ । अहिले कम्पनी बन्द भएपछि ४ महिनादेखि न काम न दाम भएर बस्नु परेको उनीहरु बताउँछन् ।
बिरामी हुँदा समेत समान्य औषधि उपचार पनि नगरेको भन्दै कम्पनीले तलब पनि नदिने र घर फर्किने टिकट पनि नदिने बताएका छन्। कम्पनी र मेनपावरले जे मन लाग्यो गर्नु हामी केही सहयोग गर्दैनौं भनेपछि आफूहरुले साउदीस्थित नेपाली दूतावाससँग उद्दारको लागि पहल गरिदिन आग्रह गेरको गरेपनि कुनै सुनुवाई नभएको पिडितहरु बताउँछन् ।
यता, दूतावासले भने पीडितहरुले काम नभए बसेको धेरै समय भएको जनाउँदै उद्दारको लागि कम्पनी प्रशासनसँग समन्वय गरिरहेको जनाएको छ । एनआरएनए साउदीले पनि नेपाली दूतावास र कम्पनीलाई उनीहरुको समस्या तत्काल समाधान गर्न ताकेता गरिरहेको एनआरएनए मध्यपूर्व सहसंयोजक राजेन्द्र अर्यालले बताए ।
