६ भाद्र, वीरगन्ज ।
पर्सामा कोरोना संक्रमणबाट दुई जनाको मृत्यु भएको छ।
कोभिड विशेष अस्पताल वीरगन्ज हेल्थ केयर संक्रमित दुई जनाको मृत्यु भएको सूचना अधिकारी भूमिका अधिकारीले बताइन्। शुक्रबार राति र शनिबार बिहान कोरोना संक्रमित दुई जनाको मृत्यु भएको उनले जानकारी दिइन्। शनिबार बिहान मृत्यु हुनेमा बहुदरमाई नगरपालिका–४ का ६१ वर्षीय पुरुष छन्।
उनी भदौ ४ गते कोभिड अस्पताल भर्ना भएका थिए। दम, प्रेसरका बिरामी उनको उपचारको क्रममा बिहान ७ बजे मृत्यु भएको अधिकारीले बताइन्। शुक्रबार राति ८ बजे वीरगन्ज–२६ का ८८ वर्षीय बृद्धको उपचारका क्रममा मृत्यु भएको अधिकारीले बताइन्। उनी शुक्रबार नै अस्पताल भर्ना भएका थिए।
उनी मिर्गौलाका बिरामी थिए। डायलासिसका क्रममा उनको राति मृत्यु भएको अधिकारीले बताइन्। यता पुरानो मेडिकल कलेजमा मृत्यु भएका बृद्धमा कोरोना पुष्टि भएको छ। उपचारका क्रममा मृत्यु भएका हेटौंडाका बृद्धमा कोरोना संक्रमण पुष्टि भएको अस्पतालले जनाएको छ।
भदौ ३ गते निमोनियाँ भएर भरतपुरको पुरानो मेडिकल कलेजमा उपचारका लागि आएका ७५ वर्षीय एक बृद्धको बिहीबार राति उपचारको क्रममा मृत्यु भएको थियो। उपचारका लागि आएलगत्तै उनको स्वाब संकलन गरी चितवन मेडिकल कलेजमा परीक्षणका लागि पठाइएको थियो। स्वाब परीक्षण गर्दा उनमा पोजेटिभ देखिएको हो।
तर, चितवन मेडिकल कलेजको ल्याब हालै मात्रै स्थापना गरिएकाले त्यसको विश्वसनीयता परीक्षण गर्न बाँकी रहेकोले रिपोर्ट सार्वजनिक गरिएको थिएन। भरतपुर कोभिड ल्यावमा शुक्रबार राति गरिएको भेरिफिकेसन परीक्षणमासमेत उनको रिपोर्ट पोजेटिभ आएको हो। उनको शव भरतपुर अस्पतालको शव गृहमा राखिएको छ।
कोरोना संक्रमित भएर चितवन जिल्लाका तीनसहित अहिलेसम्म पाँच जनाको मृत्यु भएको छ । बाँकी दुई जनामध्ये एक जना कैलाली र अर्को मकवानपुरका हुन् । भरतपुरमा शुक्रबार गरिएको परीक्षणमा चितवनका २० सहित ३३ जनामा कोरोना पुष्टि भएको थियो।
