६ भदौ, काठमाडौँ ।
राष्ट्रिय पुनर्निर्माण प्राधिकरणले गत ५ वर्षमा भए/गरेका काम र अनुभवहरु आदानप्रदान गर्न ‘भर्चुअल’ माध्यमबाट राष्ट्रिय परिसंवाद कार्यक्रम गर्ने भएको छ । सोमबारबाट तीन दिनसम्म चल्ने परिसंवादमा भूकम्पपछिको पाँच वर्षमा पुनर्निर्माण र पुर्नस्थापनामा प्राप्त गरेका अनुभव, सफल अभ्यास एवं सिकाइहरु आदानप्रदान गर्नेछ ।
भूकम्पपछिको पुनर्निर्माण र पुर्नस्थापनामा नेपालले प्राप्त गरेको ज्ञान, सिकाई र अनुभवहरु अन्तर्राष्ट्रिय समुदायलाई जानकारी गराउने तथा अभिलेखीकरण गर्ने उद्देश्यले कार्यक्रम गर्न लागिएको प्राधिकरणका कार्यकारी समिति सदस्य डा. चन्द्र बहादुर श्रेष्ठले बताए । सोमबारबाट हुने कार्यक्रममा ५३ वटा सोधपत्रहरु रहेको उनले बताए । हाउजिङ, ग्रामिण घरहरु, सहरी घरहरु निर्माण गर्दाका समस्या र चुनौतीको बारेमा जानकारी दिइने उनले बताए । हाउजिङ विधामा मात्रै २४ वटा पेपर रहेको उल्लेख गर्दै उनले सम्पदाहरुमा काम गर्दा आएका समस्या, समाधान कसरी भए, कम खर्चमा भूकम्प प्रतिरोधी घरहरु कसरी बनाउन सकिन्छ भन्ने कुराहरुको विषयमा सोधपत्रहरु रहेको उनले बताए । विषयगत क्षेत्रहरु निजी आवास पुनर्निर्माण, सार्वजनिक एवं सामाजिक पूर्वाधार पुनर्निर्माण, सांस्कृतिक सम्पदा पुनर्निर्माण, जीविकोपार्जन, उद्दार तथा राहत एवं सुशासनबारे छलफल हुने उनले जानकारी दिए ।
प्राधिकरणले आगामी नोभेम्बरमा काठमाडौंमा अन्तर्राष्ट्रिय सम्मेलन गर्ने कार्यक्रम तय भएको छ । नेपालको पुनर्निर्माण तथा पुनर्स्थापनामा संलग्न विभिन्न निकाय एवं साझेदार, संघसंस्था, विज्ञ तथा व्यक्तिहरुलाई एउटै मंचमा ल्याएर पुनर्निर्माण तथा पुनर्स्थापनाका क्रममा प्राप्त सफलताहरु, उपलब्धी एवं कमी कमजोरीबारे समीक्षा गरी साझा धारणा निर्माण गर्ने परिसंवाद कार्यक्रमको उद्देश्य रहेको उनले बताए । परिसंवादमा प्राधिकरण लगायत सरकारी निकाय प्रतिनिधि, पुनर्निर्माणमा सहयोग गरेका दातृ निकाय तथा विकास साझेदार संस्थाका प्रतिनिधि, विषयगत विज्ञहरु, भूकम्प पीडित, निजी क्षेत्रका प्रतिनिधि एवं कार्यपत्रका प्रस्तोताहरु सहभागी हुनेछन् ।
