योगेन्द्र योगी
१९ भदौ, दोहा ।
कोरोना भाइरस लगायत अन्य विभिन्न कारणले कतारबाट स्वदेश फर्किन नसकेका नेपालीहरू मध्ये नेपाली दूतावासको समन्वय र नेपाल सरकारको सहजीकरण मार्फत १४२ जना नेपाली स्वदेश फर्किएका छन् ।
दोहाबाट काठमाडाैँका लागि उडेको हिमालय एयरलाइन्सको जहाजमा ७ महिलासहित १४२ जना नेपाली स्वदेश फर्किएको कतारस्थित नेपाली दूतावासका द्वितीय सचीव प्रबीण भट्टराईले जानकारी दिए ।
सचीव भट्टराईले कोरोना संक्रमणको आशंका लागेका ११ जना नेपाली भने विमानस्थ नआएको बताएका छन् । उडानमा समावेश भएका सबै नेपालीले कोभिड – १९ परीक्षण गरी पीसीआर नेगेटिभ भएको प्रमाणपत्र सहित यात्रा गरेको उनले बताए ।
स्वदेश फर्कन लागेकाहरुको यात्रा सहजीकरण तथा बिदाईका लागि सचीव भट्टराई, नेपाली दूतावासका कर्मचारी लगायत नेपाली समुदायका प्रतिनिधिहरु हमाद अन्तर्राष्ट्रिय विमानस्थल पुगेका थिए ।
यसैगरी, दूतावासका अनुसार हिमालय एयरलाइन्सको दोहा–काठमाडाँै सेक्टरका लागि सेप्टेम्बर ६, ८ र २३ तारिखमा गरी अझै ३ वटा उडान बाँकी रहेको जनाएको छ । कतारबाट कोरोनाका कारण रोजगारी गुमाएर स्वदेश फर्किने नेपाली श्रमिकहरुको संख्या बढिरहेको दूतावासले जनाएको छ ।
