२२ भदौ, काठमाडौँ ।
राष्ट्रपति विद्यादेवी भण्डारीले आफ्नो विज्ञ सल्लाहकारमा टीका ढकाललाई नियुक्त गरेकी छिन् । ढकाललाई ‘सूचना र सञ्चारसहित तोकिएको जिम्मेवारी पूरा गर्ने गरी’ नेपाल सरकारको राज्यमन्त्री सरहको विज्ञ पदमा नियुक्त गरिएको राष्ट्रपति कार्यालयले जनाएको छ ।
पाँचथरको आरूबोटेमा जन्मिएका ढकाल हाल भक्तपुर बस्दै आएका छन् । युवा अध्येता ढकालले त्रिविबाट अंग्रेजी विषयमा स्नातकोत्तर गर्नुका साथै अमेरिकाबाट उच्च शिक्षा हासिल गरेका छन् । उनी २०५० देखि २०५५ सालसम्म आरुबोटे माविमा स्थायी शिक्षक थिए । स्थायी जागिर छाडेर स्नातकोत्तर अध्ययनको लागि काठमाडाैँ आएका टीका ढकालले त्रिभुवन विश्वविद्यालयबाट अङ्ग्रेजी र राजनीति शास्त्रमा स्नातकोत्तर गरेका छन् । ढकालले अमेरिकाबाट द्वन्द्व व्यवस्थापनमा समेत स्नातकोत्तर गरेका छन् । ढकालले अहिले त्रिभुवन विश्वविद्यालयबाट विद्यावारिधि गर्दैछन् ।
विज्ञ सल्लाहकार ढकालले सार्क विकास कोष, युरोपेली शान्ति संस्थालगायतका निकायमा काम गरिसकेका छन् । ढकाल माओवादी शहीद परिवारका सदस्यसमेत हुन् । उनका भाइ मोहनप्रसाद ढकाल ०५८ साल कात्तिक ६ गते पाँचथरको आरुबोटेमा सुरक्षाकर्मीद्वारा मारिएका थिए ।
अहिले राष्ट्रपतिका विज्ञ सल्लाहकारमा लालबाबु यादव र लक्ष्मी कार्की मात्र थिए । ढकालको नियुक्तिपछि विज्ञ सल्लाहकारको संख्या तीन पुगेको छ ।
