२२ भदौ, जनकपुरधाम ।
धनुषामा खोलामा सालको काठ भेटिएको विषयमा झडप हुँदा प्रहरी निरीक्षक (इन्स्पेक्टर) घाइते भएपछि प्रहरीले ५ जनालाई पक्राउ परेका छ ।
धनुषाको बटेश्वर गाउँपालिका ५ शान्तिपुरमा आइतबार राति औहरी खोलामा भेटेको सालको काठ लैजाने विषयमा गाउँले र प्रहरीबीच झडप भएको थियोे । झडपका क्रममा गाउँलेको ढुंगामुढाबाट इलाका प्रहरी कार्यालय महेन्द्रनगरका इन्स्पेक्टर दिपक राय र प्रहरी जवान रामविश्वास पण्डित घाइते भएका थिए भने प्रहरीको लाठी चार्जबाट एक महिला सहित ३ जना स्थानीय समेत घाइते भएका थिए । इन्स्पेक्टरको निधार फुटेपछि उनलाई ६ वटा टाँका लागेको छ ।
सोही घटनाको विषयमा अनुसन्धान गर्न प्रहरीले सोमबार दिउँसो दुई महिलासहित पाँच जना गाउँलेलाई पक्राउ गरेको धनुषाका प्रहरी नायव उपरीक्षक मकेन्द्रकुमार मिश्रले जानकारी दिए । पक्राउ पर्नेमा शान्तिपुरका स्थानीय रधियादेवी सदा, रञ्जिता देवी राउत, निराजन राउत, अञ्जय सदा र फुलगेन सदा रहेका छन् । घटनाको विषयमा अनुसनन्धान तथा सोधपुछका लागि पक्राउ गरेको डीएसपी मिश्रले बताए ।
स्थानीय औरहीखोलामा दाउरा खोज्ने क्रममा आइतबार दिउँसो स्थानीय मुसहर समुदायले सखुवा काठको गोलिया भेटेका थिए । राति सोही गोलिया ट्याक्टरमा लोड गरेर गाउँलेले लैजान लागेको थाहा पाएपछि इलाका प्रहरी कार्यालय सखुवा महेन्द्रनगरको टोली पुगेको थियो । प्रहरीले सो काठ नियन्त्रणमा लिन खोजेपछि प्रहरी र गाउँलेबीच झडप भएको थियो ।
