२४ भदौ, जनकपुरधाम ।
महोत्तरीको बर्दिवास नगरपालिका ६ किसाननगरस्थित रातु खोलामा बनाइएको तटबन्ध भत्काएर क्रसर माफियाले बाटो बनाउन सुरु गरेका छन् । केहि दिन अघि रातु खोलामा करिब १५ लाखको लागतमा निर्माण गरिएको ४५ फिट लम्बाइ भएको तटबन्ध स्थानीय सुमित बालुवा प्रशोधन उद्योगले भत्काएर बाटो निर्माण गर्न लागेको छ ।
खोला अवैध रुपमा उत्खनन् गर्ने उद्धेश्यका साथ तटबन्ध भत्काएर बाटो निर्माण गर्न लागेको स्थानीयले बताएका छन । जिल्ला समन्वय समिति महोत्तरीले खोला उत्खनन् माथि प्रतिवन्ध लगाएको छ । जिससले बेलाबेलामा खोला अनुगमन पनि गर्दे आएको छ तर खोला किनारमा ३० भन्दा बढी क्रसरहरु सञ्चालनमा रहेका छन् । खोलामा रहेका सबै क्रसरहरु मापदण्ड विपरित नै सञ्चालनमा रहेको स्थानीयले बताएका छन् । यस्ता गम्भिर विषयमा पनि स्थानीय सरकारले उदासिनता देखाएको भन्दै स्थानीयले असन्तुष्टि जनाएका छन् । अबैध उत्खनन्ले खोला नजिकका आधा दर्जन गाउँ नै जोखिममा रहेका छन् । कतै नगरपालिकाको मिलोमतोमा त कतै प्रहरी प्रशासनको मिलोमतोमा खोला खनिने क्रम अझै रोकिएको छैन ।
प्रदेश २ का रातु, जंघा, कमला, औरही, बसही लगायतका खोलामा क्रसर माफियाले दादागिरी शैलीमा खोला उत्खनन गर्दै आएको प्रभावित बनेकाहरुले बताउँदै आएका छन् । झण्डै १ वर्ष अगाडि धनुषाको औरही खोलामा क्रसर माफियाले पर्यावरण अभियन्ता दिलीप महतोले उत्खननको विरोध गर्दा क्रसर माफियाले उनको हत्या गरेका थिए । धनुषामै पेस्तोल देखाएर उत्खनन् गरेको घटना पनि सार्वजनिक भईसकेको छ । तर अझै महोत्तरीमा क्रसर माफियाको राज चलेकै छ । तटबन्धको सय मिटर पूर्व रहेको क्रसर उद्योगले रातिको समयमा उत्खनन् गर्न उक्त तटबन्ध माथिबाट बाटो निर्माण गर्न लागेको स्थानीय बताउँछन् । उक्त क्रसर उद्योगको गाडीले तटबन्ध माथि ग्राभेल हालेको र तटबन्ध माथिबाट टिपर र जेसीबी चलाउँदै आएका छन् । प्रशासनलाई जानकारी गराउँदा केहि समयमै प्रहरी आएपनि प्रहरीले गाडी देखेपनि नदेखेको जस्तो गरेर त्यहाँबाट फर्किएको स्थानीय मनोज साहले बताए ।
तटबन्ध माथिबाट गाडी लान खोज्दा नवनिर्मित तटबन्धको केहि भाग पूर्ण रुपमा क्षतिग्रस्त बनेको छ । क्रसरका मेनेजर सुनिल साहले आफुलाई वडाध्यक्षले भनेपछि मात्रै खनेको भन्दै अवैध उत्खनन्लाई निरन्तरता दिदै आएका छन् । यस विषयमा बर्दिबास नगरपालिका ६ का वडाध्यक्ष पदम आलेले भने आफुलाई यो विषयमा कुनै किसिमको जानकारी नभएको बताएका छन् । उनले आफुले कुनै क्रसर उद्योगलाई उत्खनन् तथा तटबन्ध माथिबाट बाटो निर्माण गर्न अनुमति नदिएको दाबी गरेका छन् । सुमित बालुवा प्रशोधन क्रसर उद्योगका प्रतिनिधि मनोज बैठाले गाडीको आवतजावत गर्नका लागि उक्त तटबन्ध माथिबाट बाटो निर्माण गर्न लागेको बताएका छन् ।
