२५ भदौ, विराटनगर ।
विराटनगरस्थित न्यूरो हस्पिटल अन्र्तगतको कोभिड विशेष हस्पिटलले कोरोना संक्रमितको निःशुल्क उपचार सुरु गरेको छ । प्रदेश नं १ समाजिक विकास मन्त्रालयको स्वीकृति पछि अस्पतालले मंगलबारबाट कोरोना संक्रमितको निःशुल्क उपचार सुरु गरेको अस्पतालका अपरेशनल डाइरेक्टर राजेश भट्टराईले जानकारी दिए ।
संक्रमितलाई तनाव रहित सेवा दिन अस्पताल भित्रै कोरोना संक्रमित बिरामीहरुका लागि आन्तरिक खेलकुदको व्यवस्था , टिभि हेर्ने कक्ष , भेन्टिलेटर सहितको व्यवस्थाका माध्यामबाट सेवा तथा उपचारको गुणस्तरमा ध्यान दिएको अस्पतालले जनाएको छ । न्युरो अस्पतालले गत भदौ १२ गतेदेखि विराटनगरको महेन्द्र चौकस्थित आफ्नो विस्तारित शाखा ‘मातृशिशु अस्पताल’ लाई कोभिड अस्पतालमा रुपान्तरण गरि सञ्चालनमा ल्याएको छ ।
न्युरोद्धारा सञ्चालित कोभिड हस्पिटलमा हाल सेवाग्राहीहरुको चाप दिनप्रतिदिन बढदै गईरहेको अस्पतालले जनाएको छ । जनरल ४३, आईसियु ७ र भेन्टिलेटर २ गरि ५० शैयाको क्षमतासहित सञ्चालनमा आएको कोभिड हस्पिटलमा हाल ११ जना संक्रमितहरु उपचाररत छन् । संक्रमित सबैको स्वास्थ्य अवस्था सामान्य छ । उनीहरुलाई २४ घण्टे चिकित्सकीय परामर्श, पौष्टिक तथा सन्तुलित भोजन र चिकित्सकको सल्लाह बमोजिमको आवश्यक औषधी लगायतको सम्पुर्ण सेवा सुविधा प्रदान गरिँदै आईएको अपरेशनल डाइरेक्टर भट्टराईले बताए ।
यता , अस्पतालकै कोभिड क्राइसिस म्यानेजमेन्ट एण्ड रेस्पोन्स कमिटिका संयोजक इं रंजित राज बस्नेतले प्रदेश नं. १ मै पहिलोपटक नेपाल सरकारद्धारा मान्यता प्राप्त निजी कोरोना परिक्षण प्रयोगशालाको संचालनको तयारी अन्तिम चरणमा पुगेको बताएका छन । प्रयोगशाला संचालनमा आइसके पछि ६ घण्टाभित्र नतिजा आउने गरि दैनिक ५ सय भन्दा बढिको कोरोना परीक्षण गर्न सकिने उनले बताए । प्रयोगशाला सञ्चालनमा आईसकेपछि अस्पतालका स्वास्थ्यकर्मीले शंकास्पद व्यक्तिको घरमै गएर पनि स्वाब संकलन गर्ने र यसका लागि सरकारद्धारा निर्धारित परीक्षण शुल्क लिने अस्पतालले जनाएको छ ।
