९ असोज, बाँके । बाँकेमा नेपालगन्जका थप एक कोरोना संक्रमित पुरुषको मृत्यु भएको छ । शुक्रबार बिहान उपचारकै क्रममा नेपालगन्जका एक कोरोना संक्रमित बिरामीको मृत्यु भएको स्वास्थ्य कार्यालय बाँकेले जनाएको छ ।
उपमहानगरपालिका वडा नम्बर ३, एकलैनीका ५२ वर्षीय कोरोना संक्रमित पुरुषको उपचारकै क्रममा नेपालगन्ज मेडिकल कलेज शिक्षण अस्पताल कोहलपुरमा शुक्रवार बिहान करिब साढे २ बजे मृत्यु भएको हो ।
स्वास्थ्यमा समस्या आएपछि असोज ५ गते राति ११ बजे उपचारका लागि मेडिकल कलेज कोहलपुरमा भर्ना गरिएको थियो । कोरोनाको आशंकामा ६ गते बिहान पीसीआर परीक्षण गर्दा उनमा संक्रमण पुष्टि भएको थियो । ती पुरुषलाई निमोनिया र उच्च रक्तचापको स्वास्थ्य समस्या रहेको उपचारमा संलग्न चिकित्सकले जानकारी दिएका छन् ।
योसँगै बाँकेमा कोरोनाबाट ज्यान गुमाउनेको संख्या १२ पुगेको छ ।
