१२ असोज, काठमाडौं ।
राष्ट्रपति विद्यादेवी भण्डारीले एसिड आक्रमण गर्नेहरुलाई कारबाही गर्न बनेको अध्यादेश जारी गरेकी छन् । राष्ट्रपतिले सोमबार तेजाब तथा अन्य घातक रासायनिक पदार्थ (नियमन) अध्यादेश २०७७ र फौजदारी कसूर तथा फौजदारी कार्यविधिसम्बन्धी केही ऐन संशोधन गर्ने अध्यादेश २०७७ जारी गरेको राष्ट्रपतिको कार्यालयले जानकारी दिएको छ ।
सरकारले एसिड नियमन गर्न र आक्रमण गर्नेलाई विगतको भन्दा कडा सजायको व्यवस्था गर्दै सो अध्यादेश ल्याएको हो । तेजाब तथा अन्य घातक रासायनिक पदार्थ (नियमन) अध्यादेशमा तेजाब बिक्री वितरणमा अनुमति लिनुपर्नेलगायत अन्य कडा प्रावधान राखिएको छ । त्यस्तै फौजदारी कसूर तथा फौजदारी कार्यविधिसम्बन्धी केही ऐन संशोधन गर्ने अध्यादेशमा तेजाब आक्रमण गर्नेलाई विगतको भन्दा कडा सजायको व्यवस्था गरिएको छ । अब अनुहारमा तेजाब आक्रमण गरेमा २० वर्षसम्म कैद सजाय हुनेछ ।
सोमबार नै नेपाल प्रहरी र प्रदेश प्रहरी (कार्यसञ्चालन, सुपरिवेक्षण र समन्वय) (पहिलो संशोधन) अध्यादेश २०७७ जारी गरेकी छन्।
