२८ कात्तिक, काठमाडौं ।
नेपाली कांग्रेस केन्द्रिय कार्य समितिको बैठक शुरु भएको छ । पार्टी मुख्यालय सानेपामा शुरु भएको बैठकमा कांग्रेसले देशभरका क्रियाशिल सदस्यहरुको पछिल्लो विवरण केन्द्रमा पठाउने विषयमा छलफल गर्ने जनाइएको छ ।
पार्टीका समानुपातिक तर्फबाट निर्वाचित हुनु भएका संघीय सांसद सूर्यबहादुर केसीको निधनपछि रिक्त भएको ठाउँमा पठाउने नामको पनि काग्रेसले आजै टुंगो लगाउने तयारी गरेको छ ।
नेपाली कांग्रेस पार्टी सचिवालयका अनुसार केहि महिना अघि मात्र नेपाली काँग्रेसमा प्रवेश गरेका राप्रपा नेता सुनिल थापासँगै पार्टीमा प्रवेश गरेका सदस्यहरुको जिम्मेवारी र साँगोपाँगो एकताको विषयमा पनि आजको बैठकमा छलफल हुने छ ।
क्रियाशिल सदस्यता र पछिल्लो पटक सभापति शेरबहादुर देउवाले पार्टीको विभाग गठन गरेको विषयलाई लिएर नेपाली कांग्रेसभित्र पनि विवाद कायमै छ । यस विषयमा वरिष्ठ नेता रामचन्द्र पौडेल समूहले देउवाको कार्यशैलीको विरोध समेत गर्दै आएको छ ।
