२४ मंसिर, विराटनगर । सिरहाका सन्तोष यतिबेला संयुक्त अधिराज्य बेलायतमा आफ्नो सिप र नेपालीको शुभेच्छाले इतिहास रच्ने बाटोमा अघि बढिरहेका छन ।कर्ममा विश्वास गर्ने सन्तोषबाट अहिलेसम्म सफलता पर गएको छैन ।
नेपाल र नेपाली खानालाई विश्वमाझ चिनाउने अभियानमा रहेका नेपाली सेफ सन्तोष साह बीबीसी मास्टर सेफ प्रोफेसनल्स् यूकेको टप ८ मा पर्न सफल भएका छन् । सिरहाबाट सानै उमेरमा भारत, भारतमा वर्षौँको संघर्षपछि लण्डन हानिएका सन्तोष यतिबेला विश्वमै लोकप्रिय बीबीसी मास्टर सेफ प्रतियोगिताको सेमिफाइनल चरण भन्दा माथि पुगेका छन् । पाक कलामा पोख्त सन्तोषले नेपालको हिमाली भेगमा प्रचलित खाना भुटेको काँक्रोको बियाँ, बन तरुल, कटहरको भुटेको बियाँ, प्याजको अचार, स्याउको चट्नी जस्ता परिकार चखाए । यस्ता परिकार कहिल्यै नचाखेको भन्दै निर्णायकको प्रशंसा बटुलेका उनि सेमिफाइनल चरणमा पुगेका १० प्रतियोगिमध्येबाट अन्तिम ८ मा परेका हुन् । यो राउण्डमा १० सेमिफाइनलिस्टलाई २ समूहमा प्रतिस्पर्धा गराइएको थियो । दुवै समूहबाट ४, ४ जना छनोट गरेर कूल ८ जनालाई अघिल्लो राउन्डमा पुर्याइएको हो । पहिलो राउन्डमा उत्कृष्ट प्रदर्शन गर्नेमध्ये तीन जना सिधै अर्काे चरणमा लैजाने क्रममा नेपाली सेफ सन्तोष पनि उत्कृष्ट ३ मै पर्न सफल भएका हुन् । अब छनौट भएका ८ जना प्रतियोगीबीच पनि अर्काे एक चरणको प्रतिस्पर्धा गराइनेछ र तिनबाट फाइनल राउन्डका लागि ६ जना छनोट गरिनेछ । प्रतियोगिताको फाइनल भने १७ डिसेम्बरमा हुनेछ ।
हरेक चरणमा नेपाली खानाका परिकार पस्किरहेका सन्तोषले यसअघि पोलेको भेडाको मासु, मासुको झोल, सिस्नु र आलुको तरकारी, बेथेको साग, भाङको चटनी, मकैको रोटी, तामाको अचार आदि नेपाली खाना तयार गरि चखाएका थिए । भाँडा माझ्ने काम गर्दै पाँच तारे होटलको एक्जुकेटिभ सेफसम्मको अनुभव बटुलिसकेका उनी नेपाली खाना लिएर अन्र्तराष्ट्रिय प्रतियोगितामा भाग लिने संभवतः पहिलो नेपाली हुन । प्रतियोगिता हार्नु÷जित्नु प्राथमिकतामा नपरेको बताउने उनी नेपाली खानालाई विश्वमाझ चिनाउन चाहन्छन् ।
