७ माघ, न्यूयोर्क ।
संयुक्त राज्य अमेरिकाको राष्ट्रपतिका रुपमा आजदेखि नवनिर्वाचित जो बाइडेनले कार्यभार सम्हाल्दै छन् । गत नोभेम्बर ३ मा सम्पन्न आमनिर्वाचनमा डेमोक्रेटिक दलका उम्मेदवार जो बाइडेन विजयी भएका थिए ।
रिपब्लीकन पार्टीका उम्मेदवार हुनुभएका वर्तमान राष्ट्रपति डोनाल्ड ट्रम्प पराजित भएसँगै दोस्रो कार्यकालका रुपमा राष्ट्रपतिमा निर्वाचित हुन पाएनन् र आज ह्वाइट हाउस छोड्दै छन् ।
आफ्नो शासन अवधिमा गरेका काम र लिएका नीतिका कारण कहिले आलोचित र कहिले चर्चित बनेका राष्ट्रपति ट्रम्पको बिदाइका अवसरमा विश्वका नेताहरुले विभिन्न प्रतिक्रिया दिएका छन् । इरानका राष्ट्रपति हसन रुहानीले अमेरिकी समकक्षी डोनाल्ड ट्रम्पको बिदाइको स्वागत गरेका छन् । रुहानीले टेलिभिजनमा टिप्पणी दिँदै राष्ट्रपति ट्रम्पले चार वर्षसम्म आफ्नै जनता र संसारका लागि समस्या निम्त्याउनु बाहेक अरु कुनै फलदायी कार्य नगरेको प्रतिक्रिया दिएका छन् ।
राष्ट्रपति ट्रम्पले सन् २०१६ मा सत्ता सम्हाले लगत्तै इरानसँगको आणविक सम्झौताबाट अमेरिका बाहिरिएको घोषणा गर्दै इरानमाथि कठोर आर्थिक नाकाबन्दी गरेका थिए । राष्ट्रपति रुहानीको भनाइ त्यसैको प्रतिक्रिया भएको बताइएको छ ।
