१७ माघ, विराटनगर । विराटनगर विमानस्थल विस्तारका लागि जग्गा कित्ताकाट रोकिएको छ । विमानस्थलका लागि अधिग्रहण गरिने जग्गाको कित्ताकाट रोकिएको हो ।
विराटनगर विमानस्थल प्रमुख उत्सव खरेलका अनुसार विमानस्थल विस्तारका लागि मोरङ र सुनसरीमा पर्ने १२६.४ विगाह जग्गा अधिग्रहण गरिँदैछ । जिल्ला प्रशासन कार्यालय मोरङमा छलफलपछि रेखाङ्कन भित्र परेका जग्गाको कित्ताकाट रोक्ने निर्णय भएको उनले बताए ।
विराटनगर महानगरपालिका– ४ मा रहेको विमानस्थल विस्तार गर्दा सो वडाका ३ सय घर परिवार विस्थापित हुनेछन् । विस्थापित हुने घर परिवारले उचित मुआब्जाको माग गर्दै आएका छन् । मुआब्जाका लागि बेदराज पौडेलको संयोजकत्वमा समिति गठन गरिएको छ ।
विस्तारपछि विमानस्थल विराटनगर महानगरपालिका–४ र सुनसरीको बर्जु गाउँपालिकासम्म फैलिने छ । विस्तार गर्दा विमानस्थल रहेको स्थानबाट पूर्वतर्फ ७.८३ बिघा, पश्चिमतर्फ ६९.१४ बिघा, उत्तरतर्फ ३५.८१ बिघा र दक्षिणतर्फ ८.८७ बिघा तथा सडकका लागि ३.७० बिघा जग्गा अधिग्रहण गरिनेछ ।
गत कात्तिक २७ गते विमानस्थल विस्तारका लागि आवश्यक पर्ने १२६.४६ बिघा जग्गा अधिग्रहण गर्ने निर्णय मन्त्रिपरिषदले गरेको थियो । विस्तारपछि विमानस्थलको धावनमार्गको लम्बाइ दुई हजार ५०० मिटर हुने छ । हालको धावनमार्ग एक हजार ५०० मिटरको छ ।
हाल विराटनगर विमानस्थलबाट दैनिक १४ वटा उडान–अवतरण हुँदै आएका छन् ।
