२२ माघ, जनकपुर । जनकपुरधाममा प्रचण्ड माधव समूहले आह्वान गरेको आमहड्तालको अवज्ञा गरेको भन्दै बजार बन्द गराउन हिँडेका प्रचण्ड-नेपाल समूहका नेता कार्यकर्ता र प्रहरीबीच झडप भएको छ ।
प्रहरीसँगको झडपमा परी नेकपा प्रचण्ड- नेपाल समूहका स्थायी समिति सदस्य रामचन्द्र झा घाइते भएका छन् ।
बजार बन्द गराउन जनकपुरधामको शिव चोक पुगेका नेता कार्यकर्ताहरूलाई प्रहरीले अवरोध सृजना गरेपछि झडप भएको थियो । सोही क्रममा प्रहरीले गरेको लाठीचार्जबाट नेता झा घाइते भएका हुन् ।
उनको टाउकोमा चोट लागेको नेकपा जिल्ला सचिव दीपक यादवले जानकारी दिए। नेता झालाई उपचारका लागि प्रादेशिक अस्पताल जनकपुरमा राखिएको छ।
झडपको क्रममा प्रहरीले लाठीचार्ज गर्नुका साथै १ दर्जन राउन्ड हवाइ फायर समेत गरेको जिल्ला प्रहरी कार्यालय धनुषाले जनाएको छ।
यता प्रहरीले दाहाल-नेपाल समूहका दर्जनौं कार्यकर्तालाई पक्राउ समेत गरेको छ। दाहाल नेपाल समूहका कार्यकर्ताहरूले प्रहरीको भ्यान र मालसमान ढुवानी गर्ने गाडीमा समेत तोडफोड गरेका छन्।
