२७ फागुन, काठमाडाैँ ।
नेपाल कम्युनिष्ट पार्टी(माओवादी केन्द्र) का अध्यक्ष पुष्पकमल दाहाल प्रचण्डले राष्ट्रिय स्वाधिनताको लडाइँ लड्न बाँकी रहेको बताएका छन् । बिहीबार सहिद भरत ढुंगाना स्मृतिग्रन्थ सार्वजनिकीकरण तथा परिचर्चा कार्यक्रममा बोल्दै अध्यक्ष प्रचण्डले देश भित्र र बाहिरका प्रतिक्रियावादीहरुले राष्ट्रिय स्वाधिनता र नेपाली जनताको आत्मनिर्णयको अधिकारलाई कुल्चिने दुस्साहस गरेका कारण आफु चिन्तित र आक्रोशित भएको बताएका छन् ।
उनले राष्ट्रिय स्वाधिनताको लडाँइ पूर्ण नभएकाले स्वाधिनताको लडाइँ लड्न बाँकि रहेको बताए । उनले भने – ‘यो प्रतिक्रियावादी देशी विदेशीहरुले नेपालको राष्ट्रिय स्वाधिनतालाई, नेपाली जनताको आत्मनिर्णयको अधिकारलाई फेरी एकचोटी जर्बजस्ती कुल्चिने दुस्साहस भइराखेको छ । म चिन्तित छु । म आक्रोशित पनि छु । म आफैँ आन्दोलित पनि छु । साथीहरु बिचार गर्नुहोला । हामीले राजनीतिक हिसाबले सामन्ती तन्त्रमाथि विजय हासिल गरेकै हो । तर राष्ट्रिय स्वधिनताको लडाइँ पूर्ण भएको छैन । हामीले अझै लड्न बाँकी छ भनेको त्यहीँनिर हो ।’
अध्यक्ष प्रचण्डले माओवादी आन्दोलनले ल्याएको उपलब्धी र प्रचण्डलाई निस्तेज पार्नमा प्रतिक्रियावादीले ध्यान केन्द्रीत गरेको बताए । आफुभित्र आवेग र आक्रोश रहेको भन्दै प्रचण्डले नेपालको स्वतन्त्रता र जनताको आत्मनिर्णयको अधिकार माथि कसैले धावा बोले नेपाली जनतालाई बिद्रोह गर्ने अधिकार हुने चेतावनी समेत दिए । उनले भने – ‘प्रतिक्रियावादी तत्वहरु यही माओवादी आन्दोलनले ल्याएका उपलब्धीलाई के गरी ध्वस्त पार्न सकिएला र माओवादी आन्दोलनले तयार गरेको नेतृत्वको टिम, त्यसमध्ये एक नम्बरमा अहिले पनि प्रचण्ड नै छ तपाइहरुलाई मन परेपनि, मन नपरेपनि । त्यो प्रचण्डलाई के गरी निस्तेज पार्ने होला भन्नेमा नै सबैको ध्यान । भ्रममा कोही नरहनुहोला । मैले भने नि, म भित्र फेरी एकचोटी आवेग र आक्रोश छ । नेपालको स्वतन्त्रतामाथि, नेपाली जनताको आत्मनिर्णयको अधिकार माथि कसैले धावा बोल्छन् भने नेपाली जनतालाई फेरी एकचोटी बिद्रोह गर्ने अधिकार हुन्छ ।’
नेपालमा शान्तिपूर्ण ढंगले जनविद्रोह गर्न सकिने सम्भावना रहेको उनको भनाई छ । प्रतिक्रियावादीले नेपालले प्राप्त गरेको उपलब्धीलाई निमोठ्ने र नेपाललाई कब्जामा राख्न सोचे हालसम्मका आन्दोलनबाट प्राप्त जागरणलाई केन्द्रीत गरेर कलरफुल रिभुलुसनमा लगि षडयन्त्रलाई चकनाचुर पार्न सकिने पनि अध्यक्ष प्रचण्डले बताए ।
