२ साउन, एजेन्सी ।
अफगानिस्तानमा भिडन्तहरु भैरहेकै बेला अफगान सरकार र तालिबानका प्रतिनिधिहरूबीच भेट भएको छ ।
कतारको दोहामा भइरहेको उच्चस्तरीय छलफलमा सहमतिका लागि दुवै पक्षले पहल गरिरहेका समाचारसंस्था अल जजिराले जनाएको छ ।
विदेशी सेना फर्कन थालेसँगै तालिबानले विभिन्न भूभागहरु कब्जा गर्ने क्रम शुरु भएपछि अफगानिस्तानमा तनाव बढेको हो । यही तनावका बीच भएको भेटमा सरकारी टोलीको नेतृत्व पूर्व प्रमुख कार्यकारी अब्दुल्लाह अब्दुल्लाहले गरेका हुन् ।
उनले अफगानिस्तानमा जारी युद्धको समाधान वार्ता मात्रै भएकोले सबै सम्भावनाहरुलाई खुल्ला राखेर वार्ता भइरहेको बताएको अल जजिराको खबरमा उल्लेख छ ।
तालिबानका प्रवक्ता मोहम्मद नेइमले पनि आफ्नो समूहले वार्ता र सहमतिमै जोड दिँदै आएको बताएका छन् । दुवै पक्षले सहमतिको कुरा गरिरहेका भए पनि अफगानिस्तानमा पछिल्लो समय अवस्था खराब बन्दै गइरहेको छ ।
तालिबानले पछिल्लो समय पाकिस्तान, ईरान, उज्वेकिस्तान र ताजकिस्तानसँग जोडिएका क्षेत्र पनि कब्जामा लिएको छ ।
