२१ साउन, काठमाडौं ।
नेपाल भूमिहीन सुकुम्बासी संगठनले भूमि आयोग खारेजीविरुद्ध आन्दोलनको घोषणा गरेको छ । सरकारले भूमिहीनको जग्गा प्राप्ति गर्ने मौलिक अधिकार खोस्ने निर्णय गरेको भन्दै संगठनले आन्दोलनको घोषणा गरेको हो ।
संगठनकी अध्यक्ष शान्ता चौधरीले बिहीबार प्रेस विज्ञप्ति जारी गर्दै परमादेशद्वारा गठित सरकारले जमिनको मालिक बन्ने सपना बोकी बसेका लाखौं भूमिहीन सुकुम्बासी र दलितहरूको छातीमा लात हानेको आरोप लगाएकी छन् ।
पूर्वकमलरी चौधरी एमाले संसदीय दलको सचेतक पनि हुन् । भूमिहीन सुकुम्बासी संगठनले विरोधपत्र बुझाउने, सुकुम्बासी बस्तिहरूमा जानकारी तथा जागरण कार्यक्रम गर्ने र साउन २४ गते सबै जिल्लामा विरोधसभा गर्ने जनाइएको छ । संगठनले त्यसपछि आन्दोलनका अरु कार्यक्रम तय गर्ने बताएको छ ।
बुधबार बसेको मन्त्रीपरिषदले भूमि सम्वन्धी समस्या समाधान गर्न केपी ओली नेतृत्वको सरकारले बनाएको आयोग विघटन गरेको थियो ।
