२१ साउन, काठमाडौं ।
सरकार र उखु किसानबीच बिहीबार भएको छलफल बिना निष्कर्ष सकिएको छ । उद्योग वाणिज्य तथा आपूर्ति मन्त्रालय र उखु किसानबीच बाँकी रकम बक्यौताको विषयमा भएको छलफलमा कुरा नमिलेको सङ्घर्ष समिति सर्लाहीका संरक्षक राकेश मिश्रले जानकारी दिए ।
छलफलमा उखु किसानको बक्यौता भुक्तानीका लागि गठन भएको कार्यदल समितिले तयार पारेको प्रतिवेदनमा उखु किसानहरुले हस्ताक्षर गर्नुपर्ने विषय उठेको उनले बताए । उनले किसानले हालसम्म पाएको रकम र बक्यौता त्यसको नामावलीसहित सार्वजनिक गर्न भनेकामा त्यो पनि नगरेकाले आफूहरूले हस्ताक्षर नगरेको बताए । जसका कारण सो प्रतिवेदन अझै सार्वजनिक भएको छैन ।
संरक्षक मिश्रले बक्यौता रहेको ९० करोडमध्ये २५ करोडमा विवाद रहेको बताए । उनले बाँकी ६५ करोड मुक्तानी गर्न लगाउने र २५ करोडमाथि छानविन गर्ने सम्झौता थियो । ६५ करोडमध्ये अझै १५ करोड लिन बाँकी रहेको उनले बताए ।
यद्यपी विवादित २५ करोड रकम बक्यौताको लागि सिडिओ कार्यालयले ३५ दिने सूचना जारी गरेर उद्योगीमाथि कारबाही गरेर रकम भुक्तानी गराउने कुरामा पनि छलफल भएको उनले बताए ।
किसानले बक्यौता भुक्तानी नभए भदौ ५ देखि आन्दोलन गर्ने चेतावनी दिएपछि बिहीबार पहिलो बैठक बसेको हो ।
