३२ साउन, एजेन्सी ।
तालिवानले अफगानिस्ताको काबुलको एक होटलमा बसिरहेका नेपाली सुरक्षा गार्डसहित विदेशी कामदार/कर्मचारीहरुलाई तत्काल होटल छाड्न आदेश दिएको छ । तालिवानले उनीहरुलाई हमिद करजाई अन्तर्राष्ट्रिय विमानस्थलमै गएर बस्न निर्देशन दिएका हुन् ।
होटलमा झन्डै एक सय ५० जना नेपाली सुरक्षागार्ड छन् । जर्मन, क्यानेडियन, विश्व बैंकलगायत अन्तर्राष्ट्रिय संस्थाहरुमा कार्यरत नेपालीसहित विदेशी बसिरहेको होटलमै पुगेर तालिवानले तत्काल होटल छोड्न निर्देशन दिइएको हो ।
एक नेपाली सुरक्षा गार्डले भने ‘हामीलाई तुरुन्तै होटल छोड्नुपर्ने तालिवानको आदेश छ । हामी विमानस्थल जान सबै साथीहरु होटल बाहिर निस्किएका छौं । ’
होटलबाट विमानस्थल दुई किलोमिटर मात्रै टाढा छ । उनीहरु आइतबार बिहान काबुलस्थित दूतावासको परिसरबाट होटल आएर बसेका थिए । उनले आफुहरुमाथि कुनै नराम्रो दुर्व्यवहार नगरिएको बताए ।
