१२ भदाै, कावासोती।
पूर्वी नवलपरासीको हुप्सेकोट गाउँपालिका ४ माथिल्लो चार घरेमा पहिरो जाँदा बेपत्ता भएका तीन जना अझै फेला पर्न सकेका छैनन् । बिहीबार राति पहिरोमा परि बेपत्ता भएका एकै परिवारका तीन जना अझै फेला पर्न नसककेको जिल्ला प्रहरी कार्यालयका प्रमुख एसपी प्रकाश मल्लले जानकारी दिए ।
शुक्रबार दिनभर उनीहरुको उद्धारमा सातजना प्रहरीको टोली खटिएको थियो । शनिबार विहानबाटै उद्धार कार्य जारी राखेको भए पनि अझै फेला पार्न सकिएको छैन । निरन्तर वर्षा भएकाले उद्धारमा समस्या भएको जनाइएकाे छ ।
पहिरोमा परी बेपत्ता भएको खोजी कार्यका लागि थप टोली परिचालन गर्न लागिएको मल्लले बताए । थप ५० जना सुरक्षाकर्मीको टोली पहिरोमा पुरिएकाको खोजीका लागि पठाएको प्रमुख मल्लले बताए । एक्साभेटरको प्रयोगमा खोजी गरे सहज हुने भए पनि पहाडी क्षेत्र भएकाले घटनास्थलसम्म साधन पुर्याउन गाह्रो हुने हुँदा सुरक्षाकर्मीको थप टोली परिचालन गर्न लागिएको उनले जानकारी दिए ।
पहिरोमा परी हस्तबहादुर पुलामीका श्रीमती ४० वर्षीया धनमाया पुलामी, नातिनीहरू ७ वर्षीया भुमिसार पुलामी र छ वर्षीया देउमाया पुलामी वेपत्ता भएका हुन् । हस्तबहादुरको भने स्थानीय र सूरक्षाकर्मीको टोलीले उद्धार गरेका थिए ।
