१४ भदाै, एजेन्सी ।
अमेरिकाका समुद्र तटीय क्षेत्रहरु हरेक वर्ष जसो नै शक्तिशाली आँधीसँग जुध्दै आएका छन् । त्याहाका सानातिना सामुद्रिक आँधीलाई सामान्य रुपमा लिइन्छ तर यतिबेला भने अमेरिकाको लुइजियाना क्षेत्र हालसम्मै सर्वाधिक शक्तिशाली मध्येको एक समुद्री आँधीसंग जुधिरहेको छ । आइडा नाम दिइएको आँधी जमीनतर्फ अघि बढिरहँदा त्यसले तटीय क्षेत्र डुबाएको छ ।
आँधीका कारण अहिले लुइजिआनाका सात लाख ५० हजार भन्दा बढी घरमा विद्युत आपूर्ति बन्द भएको छ । न्यू अर्लियन्समा पूर्ण रुपमा विद्युत आपूर्ति बन्द भएको छ । स्थानीय समय अनुसार आइतबार बेलुका लुइजिआनाको तटीय क्षेत्रमा ल्याण्डफल गर्दा आइडा आँधीका कारण २४० किलोमिटर प्रतिघण्टाको गतिमा हावा चलेको जनाइएको छ ।
स्थानीय प्रशासनले सुरक्षित स्थानमा नगएकाहरुलाई सेल्टर तयारी अवस्थामा राख्न सुझाव दिएको छ । दशौँ हजार व्यक्तिहरूलाई तटीय क्षेत्रबाट उद्धार गरिएको छ र त्यहीँ बसिरहेका व्यक्तिहरूलाई कैयौँ दिनसम्म मद्दत गर्न नसकिने सम्भावनातर्फ अधिकारीहरूले सचेत गराएका छन् । आँधीका कारण आएको तीव्र गतिको हावाले ढालेको रुखले च्याप्दा बाटन रफ क्षेत्रमा एकजनाको ज्यान गएको छ । न्यूअर्लियन्स नजिकै अस्पतालको छानाको हिस्सा आँधीले उडाएको थियो । सन् २००५ मा आएको शक्तिशाली क्याट्रिना आँधीका कारण नराम्रोसँग प्रभावित भएको न्यू अर्लियन्समा त्यो बेला १८ सयजना भन्दा बढीको ज्यान गएको थियो । अहिले सम्भावित जोखिमविरुद्ध सो शहर कत्तिको तयार छ भन्ने पनि यो आँधीले थाहा हुने ठानिएको छ ।
राष्ट्रपति जो बाइडेनले आइडा आँधी अति खतरनाक हुन सक्ने बताएका छन् । बाइडेनले आपूर्ति पुनः स्थापित गर्नका लागि केही हप्ता लाग्न सक्ने बताएका छन् । यद्यपी मौसमविद्हरूले आइडा अलिकति कमजोर भएर क्याटगरी थ्रीको आँधीमा रूपान्तरण भएको उल्लेख गरेका छन् । तर उसले निरन्तर रूपमा दुई सय किलोमिटर प्रतिघण्टा वेगको आँधी निम्त्याइरहेको र बिस्तारै उत्तरतर्फ बढिरहेकाले यसको विनाशकारी क्षमता अझ बढी हुनसक्ने चेतावनी दिइएका छन् । गल्फ अफ मेक्सिकोमा गएको हप्ता देखिएको गर्मीका कारण आइडा आँधी शक्तिशाली बनेको बताइएको छ ।
मेक्सिकोको खाडीस्थित न्यानो पानी भएका क्षेत्रबाट आइडाले शक्ति आर्जन गरेको थियो । आँधीले न्यूअर्लियन्सको दक्षिणमा रहेको पोर्ट फोर्सन् नजिकको जमिनमा क्याटगोरी फोरको आँधीका रूपमा अवतरण गरेको थियो जसको अर्थ यसले गम्भीर क्षति पु¥याउने आँकलन गरिएको थियो । अमेरिकी राष्ट्रिय मौसम विभागले न्यूअर्लियन्सका बासिन्दालाई घरभित्रका झ्याल नभएका कोठामा जान र भित्रै बसिरहन सुझाव दिएको छ । आँधीका कारण मेक्सिकोको खाडीको लगभग ९० प्रतिशत तेल उत्पादनको काम रोकिएको छ ।
