२४ भदौ, पोखरा ।
लैङ्गिक हिंसा तथा मानव बेचविखनमा परेर उद्धार गरिएका दिदीवहिनीहरुलाई थ्रि एन्जल्स नेपालले तीजको अवसरमा को दर खुवाएको छ ।
हरितालिका तीजको अवसरमा संस्थाले गण्डकी प्रदेशका शिक्षा, संस्कृति, विज्ञान प्रविधि तथा सामाजिक विकास मन्त्री मेखलाल श्रेष्ठको प्रमुख आतिथ्यतामा दर खुवाउने कार्यक्रम गरेको हो ।
सो अवसरमा सेवाग्राही हरुसंग मन्त्री श्रेष्ठले अन्र्तक्रिया समेत गरेका थिए । साथै उनले संस्थाका गतिविधि र आगामी योजनाहरुबारे जानकारी समेत लिए । संस्थाबारे संस्थापक अध्यक्ष एवं प्रमुख कार्यकारी डा. राजेन्द्र गौतमले जानकारी दिएका थिए ।
छलफलका क्रममा मन्त्री श्रेष्ठले संस्थाले राम्रो काम गरेको देखेर आफू निकै प्रभावित भएको बताए । सो अवसरमा थ्रि एन्जल्स नेपालका अध्यक्ष शारदा खत्री गौतमले उद्धार रोकथाम र पुनःस्थापनालाई केन्द्रमा राखेर संस्था अघि बढिरहेको जानकारी दिँदै पुनःस्थापना गृह सञ्चालनका लागि संस्थाले प्रदेश सरकारको साथ रहेमा अझ धेरै काम गर्न सकिने बताईन् ।
उद्धारका लागि सरकारी टोली समेत गठन गरेर साझेदारी गर्न सकेमा पीडितहरुलाई उद्धार गर्न थप सहज हुने उनको प्रस्ताव थियो । संस्थाले मानव बेचविखन रोकथामका लागि रेडियो र अनलाईन टेलिभीजन, उद्धारका प्रहरी संगको साझेदारीमा उद्धार समूह परिचालन तथा पुनःस्थापनाका लागि विभिन्न सीपमुलक तालिम तथा सहकारी, लघुवित्त र पुनःस्थापना केन्द्र सञ्चालन गरिरहेको उनले अवगत गराईन् । साथै बालबालिका क्षेत्रमा काम गर्दा बालगृह र विद्यालय समेत संस्थाले सञ्चालन गरिरहेको उनले जानकारी दिईन् ।
मन्त्री श्रेष्ठले संस्थामा रहेका सबै विभागहरुको चासोपूर्वक अवलोकन गरेका थिए । पोखरा १५ नयागाउँस्थित आफ्नै सुविधासम्पन्न कम्पलेक्समा संस्था अन्र्तगतका आम्दानी प्रदायक विभाग, थ्रि एन्जल्स रेडियो तथा अनलाईन टेलिभीजनको मन्त्री श्रेष्ठले अवलोकन गरेका हुन् ।
