१७ असोज, काठमाडौं ।
पटका तथा आतिसबाजीजन्य पदार्थको भण्डारण गरिएको एक गोदाममा प्रहरीले छापा मारेको छ।
काठमाडौंको कागेश्वरी मनोहरा नगरपालिका–८ गोठाटारमा रहेको गोदाममा छापा मारेर गैरकानुनी रुपमा लुकाइ छुपाइ राखेका पटाका, भुइचम्पा लगायतका आतिसबाजीजन्य विस्फोटक पदार्थ प्रहरीले बरामद गरेको छ।
प्रहरीले पटका भण्डारण गरेर राखेको आरोपमा १ जनालाई पक्राउ समेत गरेको छ। पक्राउ पर्नेमा सर्लाहोको रामनगर गाउँपालिका–१ घर भइ काठमाडौंको गोठाटार बस्ने ३० वर्षीय कामेश्वर प्रसाद यादव छन्।
प्रहरीका अनुसार कवाडी संकलनको काम गर्दै आएका कामेश्वरले गोठाटारको जलबिनायक चोकनजिक आफ्नो कवाडी गोदाममा पटका समेत लुकाएर राखेका थिए।
विशेष सूचनाको आधारमा महानगरीय अपराध महाशाखाबाट खटिएको टोलीले उनको गोदामबाट विभिन्न प्रकारका आतिसबाजीजन्य विस्फोटक पदार्थ बरामद गरेको छ। बरामद पटाकाको बजार मूल्य २५ लाख रुपैयाँ हुन आउने प्रहरीले जानकारी दिएको छ।
पक्राउ परेका यादवलाई विस्फोटक पदार्थसम्बन्धी कसूरअन्तर्त थप अनुसन्धान र कारबाहीका लागि महानगरीय प्रहरी परिसर पठाइएको महाशाखाले जानकारी दिएको छ।
