१९ असोज, काठमाडौं ।
छोटो दूरीमा चल्ने सार्वजनिक गाडीले आफूखुसी बढी भाडा लिन थालेका छन् ।
काठमाण्डौ उपत्यकाभित्र चल्ने सार्वजनिक गाडीले भाडा बढेको सूची देखाउँदै यात्रुबाट बढी भाडा उठाउन थालेका हुन् । न्यूनतम १४ रुपैयाँ भाडा तोकिए पनि अहिले यात्रुले २० रुपैयाँ तिर्न बाध्य छन्।
चार किलोमिटरसम्मको दूरीमा न्यूनतम १४ रुपैयाँ भाडा भए पनि यात्रुले यस अघि पनि १५ रुपैयाँ तिर्दै आएका थिए । छोटो दूरीको भाडा नबढे पनि यात्रु भने ६ रुपैयाँ बढी तिर्न बाध्य भएका हुन् । चालक–सहचालकले बढेको भाडादरको सूची नै देखाउने गरेका यात्रुको गुनासो छ ।
उनीहरुले देखाउने भाडादरको सूचीमा सरकारले असोज १५ गते गरेको निर्णय भनिएको छ । तर अहिलेसम्म छोटो दूरीमा भाडा नबढेको वाग्मती प्रदेशको भौतिक पूर्वाधार विकास मन्त्रालयले जनाएको छ ।
मन्त्रालयका प्रवक्ता नवीनकुमार सिंहले भाडाबारे आधिकारिक निर्णय नहुँदासम्म बढी भाडा असुलेको पाइएमा कारबाही हुने बताए ।
यस्तै, यातायात व्यवस्था विभागले पनि भाडा नबढेकाले बढी भाडा लिन नपाइने जनाएको छ । सरकारले गएको असार २९ गते लामो तथा मध्यम दूरीमा २८ प्रतिशतसम्म भाडा बढाएको थियो ।
तर, काठमाण्डौ उपत्यका र जिल्लाभित्र चल्ने गाडीमा भाडा बढेको छैन । यातायात व्यवसायीले भने भाडा समायोजन गर्न माग गर्दै आएको छ । भाडा बढाउन माग गर्दै उनीहरुले हिजो काठमाण्डौमा गाडी तेर्स्याएर विरोध प्रदर्शन समेत गरेका थिए ।
