२० असाेज, एजेन्सी ।
इन्डियन प्रिमियर लिग (आईपीएल) टी–ट्वान्टी क्रिकेटमा मुम्बई इन्डियन्सले राजस्थान रोयल्समाथि जित निकालेको छ। सारजाहमा मंगलबार राति सम्पन्न भएको खेलमा मुम्बईले राजस्थानलाई ८ विकेटले हराएको हो।
राजस्थानले दिएको ९१ रनको लक्ष्य मुम्बईले ८ ओभर २ बलमा २ विकेट गुमाएर पूरा गर्यो। मुम्बईको जितमा इशान किशनले अविजित ५० रन बनाए भने कप्तान रोहित शर्माले २२ रन जोडे।
मुम्बईका लागि सूर्यकुमार यादवले १३ रन बनाउँदा हार्दिक पाण्डेयले अविजित ५ रन बनाए। राजस्थानका मुस्ताफिजुर रहमान र चेतन साकरियाले १/१ विकेट लिए।
टस हारेर पहिले ब्याटिङ गरेको राजस्थानले २० ओभरमा ९ विकेट गुमाएर ९० रनमात्र बनाएको थियो। राजस्थानका इभिन लेविसले सर्वाधिक २४ रन बनाए भने डेभिड मिलरले १५ रन जोडे। त्यसैगरी, यासभी जैसवाल र राहुल टेवाटियाले समान १२/१२ रन बनाउँदा राजस्थानका अन्य खेलाडीले दोहोरो अंक जोड्न सकेनन्।
मुम्बईका नाथन कल्टर निलले ४ विकेट लिए। जेम्स निशमले ३ तथा जस्प्रित बुम्राहले २ विकेट लिए। जितसँगै १३ खेलबाट १२ अंक जोडेको मुम्बई अंक तालिकाको पाँचौं स्थानमा उक्लिएको छ। उसको प्ले अफ सम्भावना कायमै छ।
राजस्थान १० अंक जोडेर सातौं स्थानमा रहेको छ।
