२० असोज, कपिलवस्तु ।
कपिलवस्तुको कृष्णनगर नगरपालिकामा झाडापखालाले दुई जनाको मृत्यु भएको छ। कृष्णनगरको तीन वटा वडामा फैलिएको झाडापखालाका कारण दुई सय भन्दा धेरै बिरामी अस्पताल भर्ना भएका छन्।
नगरपालिकाको वडा नम्बर ७, ८,९ मा बान्ता र झाडापखालाका बिरामी भेटिएका नगरपालिकाका सूचना अधिकारी कामेश्वर प्रसाद दुवेले जानकारी दिए।
झाडापखालाका कारण दुई जनाको ज्यान गएको उनले बताए। स्थानीय शिवराज अस्पताल र क्लिलिनहरुमा बिरामीको उपचार भइरहेको उनको भनाइ छ।
नगरपालिकाको बहादुरगञ्ज, सुखरामपुर, देवानगढिया, जमुनी, दयानगर, विजयनगर,लगायतका गाउँमा झाडा पखाला र बान्ताका बिरामी बढिरहेको दुवेले जानकारी दिए।
बिरामीको चाप बढेपछि अस्पतालमा शय्या अभाव भएपछि एउटै बेडमा दुई जना र कतिपयलाई खुला आकाशमुनि उपचार गर्नुपर्ने अवस्था आएको शिवराज अस्पतालका सूचना अधिकारी रविप्रकाश उपाध्यायले बताए।
बिरामीको संख्या धेरै भएपछि अस्पतालको बाहिर डोरी टाँगेर स्लाइन दिने व्यवस्था मिलाइएको छ।
गम्भीर अवस्थाका बिरामीलाई जिल्ला अस्पताल र लुम्बिनी प्रादेशिक अस्पतालमा रेफर गरिएको छ। बिरामीहरुमा धेरेजसो बालबालिका रहेका छन्।
झाडापखाला कसरी फैलियो भन्नेबारे पत्ता लाग्न सकेको छैन। यसबारे अध्ययन भइरहेको दुवेले बताए।
