२० असाेज, काठमाडौं।
पोखरा राइनोजलाई ९ विकेटले पराजित गर्दै चितवन टाइगर्स एभरेष्ट प्रिमियर लिग (इपिएल) काे फाइनलमा पुगेको छ । इपिएलको पहिलो क्वालिफायरमा चितवनले बलिङ र ब्याटिङ दुबैमा सानदार प्रदर्शनका साथ पहिलो पटक फाइनलमा स्थान पक्का गरेको छ ।
बुधबार टियु मैदानमा जितको लागि ६७ रनको सामान्य विजयी लक्ष्य पछ्याएको चितवनले ७.५ ओभरमा १ विकेट गुमाउँदै पूरा गर्यो । ओपनर मोहम्मद शाहजादले २६ बलमा ७ चौका र २ छक्का सहित ४८ रनमा क्याच आउट भए । शाहजाद नन्दन यादवको बलमा कट एण्डबोल्ड आउट हुन पुगेका थिए ।
हासिम अन्सारी २० बलमा १ चौका र १ छक्का सहित १४ रनमा अविजित रहे । करिम जन्नत ४ रनमा अविजित रहे । हासिमले जारी इपिएलमा पहिलो खेल खेलेका हुन् ।
त्यसअघि टस हारेर ब्याटिङको निम्तो पाएको पोखरा १५ ओभरमा ६६ रनमा अल आउट भएको थियो । पोखरा रिचार्ड लेभीले सर्वाधिक १९ रन बनाए । चितवनको घातक बलिङ सामु पोखरा ८ खेलाडीले दोहोरो अंकमा रन बनाउन सकेनन् । एक समय ७.५ ओभरमा ४०-१ को अवस्थामा रहेको पोखराले खराब ब्याटिङ गर्दै बाँकी १६ रन जोड्न ९ विकेट गुमाएपछि ६६ रनमै अल आउट भएको हो । यो इपिएल इतिहासकै सर्वाधिक कम योगफल हो । यसअघि २०१८ मा पोखराले विराटनगर वारियर्सविरुद्ध सर्वाधिक कम ८४ रन बनाएको थियो ।
कप्तान सोमपाल कामीले पाँचौं ओभरको अन्तिम बलमा पोखरा ओपनर रिचार्ड लेभीलाई १९ रनमा बोल्ड आउट गर्दै चितवनलाई महत्वपूर्ण सफलता दिलाएका थिए। लेभी १२ बलमा २ चौका र १ छक्का प्रहार गरे । आठौं ओभरको अन्तिम बलमा स्पिनर सागर ढकालले ओपनर सुनिल धमलालाई १८ रनमा बोल्ड आउट गरे । धमलाले ३१ बलमा २ चौका प्रहार गरे ।
स्पिनर साहब आलमले नवौं ओभरको दोस्रो बलमा कप्तान विनोद भण्डारीलाई शून्यमा एलबीडब्लू आउट गरे । विनोद पहिलो बलमै आउट हुँदै गोल्डेन डक पेभिलिएन फर्केका थिए । तीन बलपछि साहबले सहान अर्चाचिगेलाई ३ रनमा विकेटकिपर मोहम्मद शाहजादबाट क्याच आउट गराए ।
दशौं ओभरको पहिलो बलमा सागरले असेला गुणरत्नेलाई १ रनमा बोल्ड आउट गर्दै पोखरालाई ४३-५ को अवस्थामा पुगेको थियो । सागरले विवेक यादवलाई २ रनमा एलबीडब्लू आउट गरेपछि पोखरा संकटमा पुगेको छ । पोखराले अन्तिम पाँच रन जोड्न ५ प्रमुख ब्याटरलाई गुमाएपछि ठूलो समस्यामा परेको थियो । लोकेश बम ५ र विक्रम सोब ३ रनमा आउट भए ।
सुशान भारी १२ रनमा आउट भए । स्पिनर सागर ढकालले ४ ओभरमा १४ रन खर्चेर ४ विकेट लिए । साहब आलमले ४ ओभरमा १० रन खर्चेर ४ विकेट लिए । करिम जन्नत र सोमपाल कामीको नाममा १-१ विकेट रह्यो ।
चितवन पहिलो पटक इपिएलको फाइनलमा पुगेको हो । यसअघि २०१७ मा लिगमा पुछारमा हुँदै बाहिरिएको थियो । २०१८ मा एलिमिनेटरमा भैरहवासँग पराजित भएको थियो । चितवनले फाइनलमा उपाधिको लागि दोस्रो क्वालिफायरको विजेतासँग शनिबार खेल्नेछ । लिगको खेलमा चितवनले पोखरालाई ९ विकेटले पराजित गरेको थियो ।
एलिमिनेटर खेलमा आजनै काठमाडौं किंग्स इलेभेन र भैरहवा ग्ल्याडियटर्सबीच प्रतिस्पर्धा हुँदै । एलिमिनेटरको विजेताले बिहीबार फाइनल प्रवेशको लागि पोखरा राइनोजसँग प्रतिस्पर्धा गर्नेछन् । इपिएल विजेताले ५० लाख र उप विजेताले १५ लाख प्राप्त गर्नेछन् ।
