२० असाेज, काठमाडौं।
लोकतान्त्रिक समाजवादी पार्टी (लोसपा) प्रदेश २ का संसदीय दलका नेता जितेन्द्र सोनलले अख्तियारले मुख्यमन्त्री कार्यालयमा छापा मार्दैमा संघीयतामाथि खतरा नहुने बताएका छन्। बुधबार प्रदेश सभाको सातौँ अधिवेशनको पहिलो बैठकलाई सम्बोधन गर्दै नेता सोनलले यस्तो बताएका हुन्।
उनीअघि बैठकमा सम्बोधनका क्रममा अख्तियारको छापाले मुख्यमन्त्री कार्यालयको गरिमामा आँच पुर्याएको भन्दै असन्तुष्टि व्यक्त गरेका मुख्यमन्त्री लालबाबु राउतलाई जवाफ दिँदै सोनलले भने, ‘संघीयता लौकाको कोपिला होइन । मुख्यमन्त्री कार्यालयमा साइकल खरिदमा भएको अनियमितताको उजुरीका अधारमा अख्तियारको छापामारीले संघीयता गुम्दैन।’
अख्तियार छानबिन गर्न आएपछि प्रभावित गर्नका लागि मसाल जुलुस निकाल्ने, आन्दोलन गर्ने काम भएको भन्दै उनले यसको कुनै अर्थ नभएको समेत बताए। उनले भने, ‘निष्पक्ष छानबिन गर्ने वातावरण बनाउनुस्, त्यसलाई प्रभावित पार्ने काम होइन । यस प्रदेशको गरिमा बचाउनका लागि मार्गप्रशस्त गर्नुस्- छानबिनका लागि।’
उनले मुख्यमन्त्रीले ३० दिनभित्र विश्वासको मत लिनुपर्ने भएपनि त्यस अनुसार नलिएको भन्दै आपत्ति जनाए। उनले भने, ‘त्यस हिसाबले ३० दिन असोजको ७ गते हुन्छ तर आज असोज २० मा हामी सदनको बैठकमा सहभागी भएका छौं। यो बीचमा सरकारले गरेको काम कारबाहीलाई संवैधानिक मान्ने कि के गर्ने? यसको सम्पूर्ण जानकारी प्रदेश सभा र यहाँका जनतालाई मिल्नुपर्छ।’
साेनालले मुख्यमन्त्रीको गतिविधिका कारण प्रदेशको गरिमामाथि प्रश्न उठेको बताउँदै मुख्यमन्त्रीले मार्ग प्रशस्त गर्नुपर्ने बताए । उनले भने, ‘साइकल खरिद विषयमा मुख्यमन्त्रीको नैतिकतामाथि प्रश्न उठेको छ । साइकल खरिदमा मुख्यमन्त्रीलाई लागेको दाग धुन मार्ग प्रशस्त गर्नुपर्छ । सुशासन भाषणमा मात्रै नभएर व्यवहारमा देखिनु पर्छ ।’
