२२ असोज, काठमाडौं ।
प्रधानमन्त्री शेरबहादुर देउवाले नेपाली कांग्रेसका पुराना नेता गजेन्द्र हमाललाई मन्त्री बनाउने तयारी गरेका छन्। सत्ता गठबन्धनका दलहरुबीच हमाललाई उद्योग, वाणिज्य तथा आपूर्ति मन्त्री बनाउने सहमति भएको एक नेताले बताए।
उनैलाई मन्त्री बनाउने उद्देश्यले सो मन्त्रालय खाली राखिएको गठबन्धनका एक नेताको भनाइ छ। उनलाई मन्त्री बनाउन माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा समाजबादीका अध्यक्ष माधवकुमार नेपाल तथा जनता समाजवादीका अध्यक्ष उपेन्द्र यादवसमेत सहमत भइसकेको जनाइएको छ।
यसअघि हमाललाई प्रधानन्यायाधीशको कोटामा मन्त्री बनाउन खोजिएको भन्दै आलोचनासमेत भएको थियो।
हमालसँग राणाको नजिकको नाता सम्वन्ध रहेको छ।
कांग्रेस बाँकेका पूर्व सभापति रहेका हमाल तत्कालीन पार्टी सभापति सुशील कोइरालालाई निर्वाचनमा हराउन लागि परेका थिए। तर, कोइरालालाई हराउन असफल भएपछि उनी कांग्रेसबाट टाढिँदै गए। उनका एक भाइ सुरेन्द्र हमाल अहिले कांग्रेसको प्रदेश सांसद रहेका छन्।
यस विषयमा हमालसँग प्रतिक्रिया लिन खोज्दा हमाल खासै बोल्न चाहेनन्। प्रधानमन्त्रीसँग भेट भएकोबारे भने उनले स्वीकारे। ‘प्रधानमन्त्रीलाई भेटेको हुँ। भेटपछि अलि अलि कुराकानी त हुन्छ नि,’ उनले भने ‘मन्त्री बनाए राम्रै हो। यो बारे धेरै नबोलौं।’
