२४ असोज, बुटवल ।
लुम्बिनी प्रदेशको मन्त्रिपरिषद आज (आइतबार) विस्तार गरिएको छ। मन्त्रिपरिषद विस्तारलगत्तै नवनियुक्त मन्त्रीहरूले पद तथा गोपनीयताको शपथ पनि लिएका छन्।
आज (आइतबार) प्रदेश प्रमुख अमिक शेरचनले नववियुक्त मन्त्री तथा राज्यमन्त्रीहरुलाई शपथ गराए।
शपथ लिनेमा कांग्रेसका तर्फबाट सरकारमा गएका ऊर्जा, जलस्रोत तथा सिँचाइ मन्त्री बनेका पाल्पाका वीरबहादुर राना, वन वातावरण तथा भूसंरक्षण मन्त्री बनेका बाँकेका सुरेन्द्र हमाल र शिक्षा विज्ञान युवा तथा खेलकुद मन्त्रीमा रुपन्देहीका वसिउद्दिन खाँ छन्।
स्वास्थ्य, जनसंख्या तथा परिवार कल्याण मन्त्रीका रूपमा दाङका इन्द्रजित थारु, आन्तरिक मामिला तथा सञ्चारमन्त्रीका रूपमा बर्दियाका तिलकराम शर्माले पनि शपथ लिए। उनीहरू माओवादी केन्द्रबाट सरकारमा गउका हुन्।
ऊर्जा, जलस्रोत तथा सिँचाइ राज्यमन्त्री अर्जुनकुमार श्रेष्ठ र पर्यटन राज्यमन्त्री रिना नेपाल विकले पनि शपथ लिए। उनीहरू कांग्रेस सांसद हुन्। माओवादी केन्द्रबाट भने स्वास्थ्य, जनसंख्या तथा परिवार कल्याण राज्यमन्त्री बनेकी दाङकी विमला खत्री वलीले पनि शपथ लिइन्।
