१४ मंसिर, विराटनगर ।
अबको केही दिन देशका धेरै ठाउँको मौसम बद्ली हुने मौसमविद्ले बताएका छन् ।
अरब सागर र आसपासमा रहेको न्यूनचापीय प्रणालीको प्रभावका कारण अबको केही दिन पारिलो घाम लाग्ने सम्भावना नरहेको मौसमविद्ले बताएका हुन् ।
यो प्रणालीका कारण पहाडी जिल्लामा वर्षा र हिमाली जिल्लामा हिमपातको सम्भावना रहेको मौसमविद् वरुण पौडेलले जानकारी दिए । भोलि सुदूरपश्चिम र पश्चिमका केही पहाडी जिल्लामा पानी पर्ने सम्भावना छ भने हिमाली जिल्लामा हिमपात हुने उनले बताए।
आज पनि सुदूरपश्चिम, कर्णाली र गण्डकी प्रदेशको उच्च पहाडी र हिमाली जिल्लामा हिमपात हुने छ । न्यूनचापीय प्रणालीको प्रभाव सुदूरपश्चिम र पश्चिमी क्षेत्रमा धेरै पर्ने सम्भावना रहेको मौसमविद् वरुण पौडेलले बताए ।
पोखरा, जुम्ला, डडेलधुरा, दीपायल, सुर्खेत लगायतका क्षेत्रमा भोलि पानी पर्ने अनुमान गरिएको छ । मध्य र पूर्वी क्षेत्रमा पानी नपरे पनि मौसम भने बद्ली हुने उनले बताए । अहिले काठमाण्डौसहित तराईका जिल्लामा हुस्सु कुहिरो लागेको छ । अन्य क्षेत्रको मौसम बद्ली भएको छ ।
यस्तै, न्यूनतम र अधिकतम तापक्रम घट्न थालेसँगै देशैभर चिसो बढेको छ । आज काठमाण्डौको न्यूनतम तापक्रम ६ दशमलव ५ डिग्री सेल्सियस मापन गरिएको छ भने अधिकतम तापक्रम २० देखि २२ डिग्री सेल्सियससम्म पुग्ने अनुमान छ।
