१० पुस, एजेन्सी ।
अफगानिस्तान तालिबानको नियन्त्रणमा आएयता त्यहाँका झण्डै आधा सञ्चारमाध्यम बन्द भएका छन्।
अलजाजिराका अनुसार सञ्चालनको लागि आवश्यक रकमको अभावमा धेरै सञ्चारमाध्यमहरू बन्द भएका हुन्। गत अगष्टमा अफगानिस्तानलाई तालिबानले आफ्नो नियन्त्रणमा लिएको थियो। रिपाटर्स विथआउट बोर्डर्स र अफगान इन्डिपेन्डेन्ट जर्नलिस्ट एसोसिएसनले गरेको सर्वेक्षणमा अफगानिस्तानका करिब ४३ प्रतिशत सञ्चारमाध्यमले आफ्नो सेवा बन्द गरेको पाइएको हो। त्यस्तै ६० प्रतिशत पत्रकार बेरोजगार भएका छन्।
अफगानिस्तानमा गर्मीयाममा ५४३ सञ्चारमाध्यमहरुले सेवा प्रदान गरिरहेका थिए। तर, नोभेम्बरको अन्तिमसम्म आउँदा यो संख्या ३१२ मा झरेको छ। अगष्ट मध्ययता अफगानिस्तानमा ६ हजार ४०० पत्रकार बेरोजगार भएका छन्।
पछिल्लो समय अफगानिस्तानमा देखिएको आर्थिक संकट नै सञ्चारमाध्यमहरू बन्द हुनुको प्रमुख कारण हो। काबुलबाट टेलिभिजन सञ्चालन भइरहेका ३ टेलिभिजनका प्रबन्धक एबिद इहासका अनुसार आर्थिक संकटको कारण अहिले सञ्चारमाध्यमको आम्दानी नराम्ररी प्रभावित भएको छ।
त्यस्तै तालिबानले लगाएको विभिन्न प्रतिबन्धको कारण पनि सञ्चालनमा समस्या देखिएको छ। तालिबानले अफगानिस्तानमा कब्जा जमाएपछि ८४ प्रतिशत महिलाले मिडिया छाडेका छन् भने ५२ प्रतिशत पुरुषले रोजगारी गुमाएका छन्।
अहिले अफगानिस्तानमा पत्रकारिताको क्षेत्रमा माहोल बिग्रिएको छ। तालिबानले पत्रकारिताको ११ नियम लागू गरेको छ। यसले प्रेस स्वतन्त्रतालाई नै असर पुर्याउने जानकारहरुको भनाइ छ। अफगानिस्तानमा पछिल्लो २० वर्षसम्म चलेको युद्धमा पत्रकारहरू सधैं तालिबानको निशानामा पर्दै आएका थिए।
