काठमाडौं, २४ चैत । प्रमुख प्रतिपक्षी दल नेकपा एमालेले निर्वाचन आयोगले तयार गरेको निर्वाचन आचासंहिताबारे ६ बुँदे ध्यानाकर्षण पत्र बुझाएको छ । बिहीबार महासचिव शंकर पोखरेलको नेतृत्वमा आयोग पुगेर एमालेले ध्यानाकर्षण गराएको हो ।
आयोगले तयार गरेको आचारसंहिताप्रति एमालेसहित साना दलले प्रश्न उठाएका छन् । आयोगले केही दिनअघि आचारसंहिताबारे छलफल गर्न दलहरूलाई बोलाउँदा आचारसंहिताका केही बुँदामाथि प्रश्न उठाएर साना दलले होहल्ला गरेका थिए ।
आयोगले उम्मेदवार भएका स्थानीय जनप्रतिनिधिले राजीनामा दिनुपर्ने प्रस्ताव गरेको छ । उक्त प्रस्तावको एमालेले विरोध गरेको छ । त्यसैगरी एमालेले मतदान अधिकृतले मतपत्र सदर वा बदर गरेको निर्णयमा प्रश्न उठाउन नपाइने प्रस्तावको पनि विरोध गरेको छ ।
एमालेले आयोगले बुझाएको ध्यानाकर्षण पत्रमा स्थानीय पालिका सदस्यहरू, मन्त्री र प्रधानमन्त्रीले चुनावी प्रचार अभियानमा संलग्न हुन नपाइने प्रस्तावको पनि विरोध गरेको छ । एमालेले मन्त्री, प्रधानमन्त्री पक्षपाती देखिन नहुने भए पनि चुनाव प्रचार नै रोक्नु गलत हुने दाबी गरेको छ ।
