९ असोज, एजेन्सी ।
पछिल्लो समय लोकप्रिय आर्टिफिसियल इन्टेलिजेन्टस (एआई) च्याटजिपिटीमा नयाँ फिचर थपिएको छ। च्याटजिपिटीको मुख्य कम्पनी ओपनएआईले सोमबार च्याटजिपिटीमा बोलेरै प्रश्न सोध्न वा संवाद गर्न सकिने फिचर समावेश भएको घोषणा गरेको हो।च्याटजिपिटीमा प्रयोगकर्ताले कुनै पनि विषयमा प्रश्न सोध्न सक्छन्। र, यसले प्रयोगकर्ताको प्रश्नको उत्तर निकै सहज र संवादात्मक शैलीमा दिन्छ।
ओपनएआईले शेयर गरेको डेमो भिडिओमा एक प्रयोगकर्ताले च्याटजीपीटीलाई कथा भन्न लगाउँछन् । प्रतिक्रियामा च्याटजीपीटीले मानव आवाजमा कथा भनेको सुनिन्छ । त्यस्तै कथा भनिसकेपछि कथामा भएका पात्र, घटनाबारे प्रश्न सोध्दा च्याटजीपीटीले उत्तर दिएको छ ।
च्याटजीपीटीको यो क्षमता ’टेक्स्ट टु स्पिच मोडल’ मा आधारित भएको र केही अक्षर तथा नमूना आवाजका आधारमा यसले मानव आवाज निकाल्न सक्ने ओपनएआईले उल्लेख गरेको छ । यसभन्दा अघिसम्म प्रश्न सोध्ने कार्य वा संवाद अक्षरमा हुने गर्थ्यो भने अब बोलेरै च्याटजिपिटीलाई प्रश्न सोध्न र यहाँबाट उत्तर पाउन सकिने भएको हो।
यसबाहेक च्याटजिपिटीमा चित्रमा आधारित रही पनि संवाद गर्न सकिने घोषणा गरिएको छ। अर्थात् प्रयोगकर्ताले कुनै पनि चित्र च्याटबटलाई देखाएर वा अपलोड गरेर उक्त चित्रकोबारे च्याटबटसँगै संवाद गर्न सकिनेछ। सार्वजनिक भएको जम्मा ९ महिनामै च्याटजिपिटी प्रयोगकर्ताको संख्या उल्लेख्य छ।हाल संसारभर च्याटजिपिटी प्रयोग गर्ने १.४३ बिलियन बढी मानिस रहेको बताइएको छ।
च्याटजिपिटीले प्रयोगकर्ताको दैनिकी सहज बनाउनका साथै यसले अध्ययनहरूमा पनि सहज बनाएको छ। च्याटजिपिटीमा च्याटबटसँग बोलेरै प्रश्न–जवाफ गर्न सकिने भएसँगै यसले संवादलाई थप अन्तरक्रियात्मक बनाउने कम्पनीले विश्वास लिएको छ। यो फिचर च्याटजिपिटीको एनड्रोइड र आइओएस एपमा मात्रै सीमित हुने बताइएको छ। चित्रमार्फत संवाद गर्न मिल्ने फिचर भने सबै प्लेटफर्ममा उपयोग गर्न सकिनेछ।
