१२ माघ, एजेन्सी ।
फ्रान्सेली किसानहरूले बिहीबार देशका प्रमुख सडकहरू बन्द गरेका छन्। उनीहरुले आफ्ना उत्पादनका क्रेट सडकमा फालेका छन् । सबैभन्दा खराब अवस्था राजधानी पेरिसको छ । जहाँ किसानहरूको आन्दोलनका कारण चारैतिर अराजकता छ। किसानले बालीको कम मूल्य, हरित नियमन र स्वतन्त्र व्यापार सम्झौतालाई तत्काल कारबाही गर्न माग गरिरहेका छन्।
यी किसानहरुको आन्दोलन अहिले पेरिससम्म पुगेको छ । फ्रान्सका राष्ट्रपति इमानुएल म्याक्रोन भने गणतन्त्र दिवसको प्रमुख अतिथिका रूपमा भारतको राजकीय भ्रमणमा आएका बेला फ्रान्समा किसान आन्दोलन चरम सीमामा छ । फ्रान्सले विश्वको पाँचौँ ठूलो अर्थतन्त्र भारतसँग आकर्षक सम्झौताको तयारी गरिरहेका बेला राष्ट्रपति म्याक्रोँलाई बिहीबार भारतमा हात्तीको स्वागत परेडका साथ रातो कार्पेटले स्वागत गरिएको छ ।
भारतीय प्रधानमन्त्री नरेन्द्र मोदीले बिहीबार साँझ १९औँ शताब्दीका महाराजाको दरबारमा म्याक्रोनका लागि रात्रिभोजको आयोजना गरे । उनी आज ट्याङ्क, ऊँट घोडचढी र लडाकू जेट फ्लाई पास्टसहित रङ्गीन सैन्य मार्चपासमा प्रमुख अतिथि बनेका छन् । उता फ्रान्सेली किसानहरूले देशको दक्षिणपश्चिममा दुई हप्ता अघि सुरु भएको विरोध प्रदर्शन झनै उग्र बनेको छ ।
आफ्ना माग पूरा नभएसम्म आन्दोलन जारी रहने उनीहरुले बताएका छन् । नयाँ युवा प्रधानमन्त्री गेब्रियल अटलका लागि किसानको आन्दोलन पहिलो ठूलो चुनौती बनेको छ । यसैबीच ईयूको सबैभन्दा ठूलो कृषि उत्पादक फ्रान्सका प्रमुख राजमार्गहरू अवरुद्ध गर्न किसानहरूले घाँसको गाँडी र ट्र्याक्टरहरू प्रयोग गरेका छन् ।
“हामीले सधैं धेरै नियमहरू पालना गर्नुपर्छ, हामीलाई जहिले पनि धेरैको लागि सोधिन्छ र हामी कम कमाउँछौं। हामी अब हाम्रो कामबाट बाँच्न सक्दैनौं,“ क्याल्भाडोस समन्वय ग्रामीण संघका किसान जीन–ज्याक पेस्केरेलले भनेका छन् । फ्रान्सको दोस्रो र तेस्रो ठूला शहरहरू,मार्सेली र लियोन जोड्ने ए ७ राष्ट्रिय राजमार्गमा किसानहरूले टमाटर, बन्दाकोबी र फूलगोभीका क्रेटहरू छरेका छन्।
जसका कारण सडकमा सवारी आवागमन समेत प्रभावित भएको छ । किसान युनियनले बुधवार राती सरकारलाई फार्मगेटको मूल्य जोगाउन बनेको कानूनको राम्रो कार्यान्वयनलगायत मागहरूको सूची बुझाएको थियो।
युनियनले कृषि सवारीसाधनका लागि डिजेल कर छुट, ईयू कृषि अनुदानको तत्काल भुक्तानी, स्वास्थ्य र जलवायु सम्बन्धी बीमा भुक्तानीमा ग्यारेन्टी र वाइनमेकरहरू र अर्गानिक किसानहरूको लागि तत्काल सहायता गर्न माग गरिएको छ ।
