१७ वैशाख , काठमाण्डौ।
अमेरिका र वेस्टइन्डिजमा आयोजनमा हुने टी २० विश्वकप क्रिकेट प्रतियोगिताका लागि अमेरिका जाने तयारीमा रहेका क्रिकेटर सन्दीप लामिछानेलाई भिसा नदिएको अमेरिकी दूताबासले सन्दीपलाई बोलाएको छ । काठमाडौंस्थित अमेरिकी दूतावासले क्रिकेटर लामिछानेलाई अन्तर्वार्ताको लागि बोलाएको छ । उनलाई अमेरिकी भिसा दिने वा नदिने सम्बन्धमा अन्तर्वार्ता लिन दूतावासले बिहीबार अपराह्नको समयमा बोलाएको परराष्ट्र स्रोतले जनाएको छ ।
काठमाडौंस्थित अमेरिकी दूतावासले यही जेठ ९ गते लामिछानेलाई अमेरिकी भिसा दिन अस्वीकार गरेको थियो । आईसीसी ट्वान्टी–२० विश्वकप क्रिकेट खेल्न अमेरिका जानको लागि उनले भिसाको लागि दूतावासमा आवेदन दिएका थिए । तर, भिसा ‘रिजेक्ट’ भएको उनले सामाजिक संजालमार्फत जानकारी दिएका थिए । सन्दीपले भिसा नपाएपछि क्रिकेट संघले सरकारलाई समन्वय गरिदिन आग्रह गरेको थियो ।
क्यानको आग्रगपछि खेलकुदमन्त्री विराजभक्त श्रेष्ठले परराष्ट्रमन्त्री नारायणकाजी श्रेष्ठमार्फत कुटनैतिक पहल गरेका थिए । जुन कुरा आज त्रिवि क्रिकेट मैदान कीर्तिपुरमा सन्दीपसँगको भेटमा पनि खेलकुद मन्त्री श्रेष्ठले बताएका छन् । युवा तथा खेलकुदमन्त्री श्रेष्ठले आज त्रिवि क्रिकेट मैदानको निरीक्षणका क्रममा सन्दीपसँग छोटो भेटवार्ता गरेका हुन्।
मन्त्री श्रेष्ठ अनुगमनका लागि पुग्दा सन्दीप मैदानमा अभ्यास खेल खेलिरहेका थिए। विश्वकपको भिसा दिन अमेरिकी दूतावासले अस्वीकार गरेको प्रसंगमा उनले आफूहरूले सक्दो प्रयास गरिरहेको जानकारी गराए। उनले आफ्नै अघि परराष्ट्रमन्त्रीले पटक पटक भिसा प्रयासका लागि समन्वय गरेको जानकारी पनि सन्दीपलाई गराएका थिए ।
यस्तै सन्दीपलाई भिसा नदिएको भन्दै अमेरिकी दूताबासको सामाजिक संजालमा पनि आलोचना भएको थियो । बुधबार मात्रै केही युवाहरुले माइतीघरमा प्रर्दशन गर्दै सन्दीपलाई भिसा दिन दबाब दिएका थिए । आईसीसी ट्वान्टी–२० क्रिकेट विश्वकप अमेरिका र वेस्ट इन्डिजले संयुक्त रूपमा आयोजना गर्दै छन् । विश्वकप आउँदो जुन २ देखि २९ सम्म हुँदै छ ।
विश्वकप खेल्नको लागि नेपाली राष्ट्रिय टिम अहिले अमेरिकामा छ । नेपालको पहिलो खेल ५ जुनमा रहेको छ । बलात्कारको आरोपमा काठमाडौं जिल्ला अदालतले दोषी ठहर गरेपछि लामिछानेलाई नेपाल क्रिकेट संघ (क्यान)ले राष्ट्रिय टिमबाट हटाएको थियो । केही दिनअघि उच्च अदालत पाटनले लामिछानेका विषयमा जिल्ला अदालतले गरेको फैसला बदर गरेपछि क्यानले सन्दीपलाई पुनः राष्ट्रिय क्रिकेट टोलीमा समावेश गर्ने प्रक्रिया अघि बढाएको थियो ।
राष्ट्रिय टिममा पर्ने भएपछि उनले अमेरिका जान काठमाडौंस्थित अमेरिकी दूतावासमा भिसाका लागि आवेदन दिएका थिए । तर, दूतावासले उनलाई भिसा दिन अस्वीकार गरेको थियो । यसअघि सन् २०१९ अगष्टमा पनि अमेरिकाले सन्दीपलाई भिसा दिन अस्वीकार गरेको थियो । त्यतिबेला उनले अमेरिकाले भिसा नदिएको कुरा सामाजिक सञ्जालमा राखेपछि अमेरिकी दूतावासले उनलाई पुनः बोलाइ भिसा दिएको थियो ।
अमेरिकाले भिसा दिए पहिलो खेलमा सहभागिता जनाउने गरी सन्दीप अमेरिका उड्नेछन् । टिममा उनको सहभागितालाई लिएर क्यानले आईसीसीलाई यसअघि नै अन्तिम टोली घोषणाका लागि केही समय मागेको थियो ।
