२१ फागुन , एजेन्सी ।
नेपाली यु–१९ क्रिकेट टोलीले घरेलु मैदानमा अफगानिस्तानसँग युथ एकदिवसीय अन्तर्राष्ट्रिय सिरिज खेल्ने भएको छ । नेपाल क्रिकेट संघ (क्यान) ले मंगलबार अफगानिस्तानको यु–१९ टोली सिरिज खेल्न नेपाल आउने जानकारी दिएको हो ।
नेपालले आइसिसी यु–१९ विश्वकपमा छनोट २०२६ को तयारीस्वरूप अफगानिस्तानसँग सिरिज खेल्न लागेको हो । पहिलो खेल अप्रिल ३, दोस्रो ६ र अन्तिम ९ अप्रिलमा हुनेछ । सबै खेल माथिल्लो मूलपानी क्रिकेट मैदानमा हुने क्यानले जनाएको छ ।
नेपालले घरेलु मैदानमा अप्रिल १२ देखि २१ सम्म यु–१९ विश्वकपमा छनोट २०२६ एसिया डिभिजन १ को आयोजना गर्दैछ । प्रतियोगितामा नेपालसहित अफगानिस्तान, हङकङ, ओमान र संयुक्त अरब इमिरेट्स (युएई) ले सहभागिता जनाउने छन् ।
त्यसैको तयारीस्वरूप नेपाली टोली बन्द प्रशिक्षणमा छन् । टोलीलाई मुख्य प्रशिक्षक शक्ति गौचनले प्रशिक्षण दिइरहेका छन् । उता युगान्डमा हुने वुमन्स डे कप अन्तर्राष्ट्रिय क्रिकेट प्रतियोगिताका लागि नेपाली टोली तयार भएको छ ।
नेपाल क्रिकेट संघले आइतबार इन्दु बर्माको कप्तानीमा १४ सदस्यीय टोली घोषणा गरेको छ । साना प्रविन र रिया शर्माले पहिलोपल्ट सिनियर टोलीमा स्थान बनाएका छन् । बन्द प्रशिक्षणमा रहेका सीमाना केसी, सबनम राई, सोभा रोकाय र मनिषा उपध्यायले अन्तिम टोलीमा स्थान बनाउन सकेनन् ।
मार्च ८ देखि १६ सम्म हुने ट्वान्टी–२० प्रतियोगितामा नेपालसहित युगान्डा, हङकङ र नामिबियाको सहभागिता रहनेछ । एक अर्कासँग दुई पटक प्रतिस्पर्धा गरेपछि शीर्ष दुई टोलीले फाइनलमा स्थान बनाउने छन् ।
नेपालले मार्च ८ मा नामिबयासँग खेल्दै प्रतियोगिताको सुरुआत गर्नेछ । यसैगरी नेपालले मार्च ९ मा युगान्डा मार्च १० मा हङकङसँग खेल्नेछ । नेपालले मार्च १२ मा नामिबिया, १३ मा युगान्डा र १४ मा हङकङसँग फेरि खेल्नेछ ।
नेपाली टोलीमा कप्तान इन्दु बर्मासहित रुविना क्षेत्री, विन्दु रावल, पूजा महतो, सम्झना खड्का, ममता चौधरी, राजमति ऐरी, रोमा थापा, रचानकुमारी चौधरी, कविता जोशी, ईश्वरी विष्ट, अलिसाकुमारी यादव, साना प्रविन, रिया शर्मा रहेका छन् ।
